Kreu i Partisë së Lirisë, Ilir Meta, u shpreh gjatë një takimi me strukturat e kësaj partie në Tiranë, se kryeqyteti do të jetë i pari kundër tiranisë.
Në fjalën e tij, Meta madje theksoi se së pari do të jemi kundër tiranisë së betonit, duke i çuar një mesazh të qartë kryebashkiakut Erion Veliaj, që akuzohet për betonizimin e qytetit.
“Shkoni pak atje ku kanë qenë lodrat te rruga e Elbasanit, shikoni se çfarë ka bërë ky që i ka të gjitha në dorë, ky që mburrej se ka prishur kioskat te Parku Rinia. Ai ngriti një mal betoni atje”, tha Meta, duke akuzuar edhe Kryeministrin Edi Rama, për të cilin tha se ai ka një raport me korrupsionin, me betonin.
“Me ligjet e tij dhe me drejtësinë e tij do ia bëjmë në mes të ditës, nuk do të bëjmë ligje të reja. E dini ju sa vuajnë qytetarët e Tiranës për të marrë një leje për të hapur një dritare, ndërsa për të ngritur kullat dhjetra katëshe, i firmos brenda ditës”, tha Meta.
Ai tha se Edi Rama bën hatanë për shkeljen e ligjeve, ka një alergji të paparë për gjelbërimin, e ka kthyer Tiranën në një kurth betoni, duke asgjesuar të gjitha korridoret ajrore të Tiranës. “Po vret shëndetin e njerëzve, ku mund të shëtisin e lozin fëmijët me këtë betonizim të qytetit? I vrau Tiranës pamjen, shëndetin, vetë iku në Surrel, sepse për mushkëritë e veta kujdeset, ndërsa për mushkëritë e qytetarëve të Tiranës është një xhelat i vërtetë. E nisi me vjedhjen e fasadave të Ministrive po e mbyll me qindra milionë euro të vjedhura me inceneratorët”, tha Meta.
Në vijim ai u shpreh se Rama është një kryehajdut, mashtrues profesionist i pangopur.
“Sigurisht që Tirana ka përjetuar si askush tjetër, pabesinë e këtij sekti makut por edhe antikombëtar që e nisi duke u përpjekur të vjedhë meritat e ish-kryeministrit Ilir Meta për t’i rikthyer Tiranës parqet e gjelbra, për të mbrojtur atë trashëgimi kulturore që kishte Tirana nga e kaluara përfshirë dhe Teatrin Kombëtar.
Për ta kthyer në Tiranën e betonit, ku nuk dallohet kulla e Sahatit për shkak se kulla të tjera qiellgërvishtëse kanë mbushur Tiranën. Tirana ka hak për të marrë, do e marrë shumë shpejt për ta kthyer pabesinë me drejtësi për t’i dhënë fund këtij degradimi. Dua t’u kthej disa vite pas kur isha kryeministër, ku mora disa vendime për t’i rikthyer Tiranës Parkun Rinia, kur ky vinte nga pas më vinte si xhol. Pastaj, krijoi legjendën sikur kishte prishur Parkun Rinia.
Pastaj tek rruga e Elbasanit, ku ka qenë një park lodrash. Më qepet si xhol nga prapa, vjen ky merrte kalamajt e mi dhe dilte në fotografi të dukej sikur punonte. Shkoni pak tek rruga e Elbasanit, tani që i ka të gjitha në dorë ky. Çfarë ka bërë ky atje, një mal betoni. Gjysma e Tiranës nuk e shohin dot më Malin e Dajtit, gjysma tjetër nuk shohin dot kodrat e Saukut”, tha Meta.
