Pronarët e mjeteve lundruese, të cilët janë licensuar nga autoritetet shtetërore, po zhvillojnë një protestë para Drejtorisë së Përgjithshme të Policisë së Shtetit, ndërsa e konsiderojnë të padrejtë bllokimin e aktivitetit të tyre.
Pronarët e mjeteve lundruese janë nga Durrësi, Lezha, Shkodra, Vlora, Saranda, ndërsa janë në pritje edhe të një takimi me Drejtorin e Përgjithshëm të Policisë së Shtetit, Gledis Nano.
Ata pretendojnë se nuk ka një vendim të shkruar për bllokimin e mjeteve të tyre të lundrimit, ndërsa i është thënë se po verifikohen dokumentet.
“Mjetet e subjekteve të licensuara nuk kanë krijuar asnjë incident. Ato që shkaktojnë incidente janë mjete private. Ne jemi kontrolluar nga grupe kontrolli që në fillim të sezonit dhe më pas 4-5 herë nga policia dhe struktura të tjera shtetërore”, tha një prej personave të licensuar për mjete lundruese.
Ai tha se mjetet e licensuara kanë një vendbazim, 300 metra larg detit dhe zona është e rrethuar me litarë dhe bova, ku nuk lejohet të hyjnë notarët, pra janë konform ligjeve dhe rregullave.
“Nuk kanë ndodhur incidente nga mjetet e subjekteve të licensuara, por nga skafet që shkojnë deri në breg të detit, pasi nuk kanë as vend bazime”, tha ai.
