Këshilltarët bashkiakë të Harares në Zimbabve pezulluan kontratën e inceneratorit të dhënë për kompaninë GeoGenix BV, kompania mëmë edhe inceneratorit të Tiranës.
Kompania është paraqitur si kompani holandeze me emrin Integrated Energy BV në shtetin afrikan, duke shfrytëzuar faktin se ishte e regjistruar në Holandë. Por, mediat afrikane shkruajnë se pas saj qëndron Mirel Mërtiri.
GeoGenix BV kishte siguruar kontratën me autoritetet qendrore, ndërsa ajo u kalua fillimisht edhe nga këshilli bashkiak i kryeqytetit të vendit afrikan rreth një vit më parë. Por, me ndryshimin e përbërjes në drejtimin dhe shumicën e këtij këshilli pas zgjedhjeve të muajit mars të këtij viti u vendos që kontrata të pezullohet.
Veç kësaj, në vendim caktohet ngritja e një komiteti ekspertësh që do të rishikojnë kontratën me vlerë 344 milionë dollarë. Kryebashkiaku i Harares, Jacob Mafume e cilësoi kontratën si “nëna e korrupsionit” dhe sfidoi autoritetet qendrore, përfshirë këtu qeverinë dhe Ministrinë e Mjedisit që vendimin e këshillit bashkiak për ta pezulluar ta çojnë në gjykatë.
Mafume i quajti ‘dele’ anëtarët e këshillit të kaluar bashkiak, që miratuan kontratën me sy mbyllur dhe sipas tij, nga kjo kontratë qytetarët nuk përfitojnë asgjë.
Kontrata 30-vjeçare e siguruar nga kompania GeoGenix BV parashikonte ngritjen e një inceneratori, ndërsa për çdo ton mbetje të depozituar, Bashkia e Harares do të paguante 40 dollarë. Kusht tjetër në kontratë ishte dorëzimi i një sasie mbi 200 mijë tonësh në vitin e parë, që do t’i siguronin GeoGenix BV 8 mln euro.
Sasia duhej të rritej në mënyrë progresive, deri kur të kalonte mbi 1 mijë tonë dita, duke i siguruar kompanisë të ardhura prej 15 mln dollarësh nga 2027 deri në 2052. Në total, gjatë të gjithë koncesionit GeoGenix BV do të paguhej 344 mln dollarë.
Sipas të dhënave të Qendrës Kombëtare të Regjistrimit, GeoGenix BV është ish-kompania Integrated Energy B.V, e regjistruar në Holandë në gusht të 2018-s, me administrator Georgi Leonidovich Birman dhe Simone Dormio. Klodian Zoto, i shpallur në kërkim për inceneratorin e Elbasanit, ka qenë administrator i shoqërisë në periudhën 2016-2018. Shoqëria ndryshoi emrin nga Integrated Energy BV në GeoGenix BV më 13 shkurt të 2020-s.
Sipas Ekstraktit Historik të Regjistrit të Pronarit Përfitues publikuar në QKB, deri në shkurt të këtij viti pronarët përfitues të kompanisë rezultojnë shtetasit italianë, Giuseppe Ciaffaglione, Alberto Presezzi dhe Salvatore Russelli.
Për 2 për qind të aksioneve të kompanië GeoGenix BV nuk identifikohen pronarët përfitues, pasi kanë më pak se 25 për qind të aksioneve të pronësisë, siç sanksionon ligji për pronarët përfitues. /GazetaSi/
