Pronarët dhe administratorët të motor skafëve kanë dalë sot në portestë para Drejtorisë vendore të kufirit dhe migracionit në Portin e Durrësit për shkak se që prej aksidentit të ndodhur në plazhin e Potamit ku humbi jetën 7 vjeçarja ata janë pezulluar pa të drejtë në mesin e sezonit pa asnjë njoftim zyrtar.
Në protestën e tyre, operatorët kanë ngritur një sërë problematikash që kanë hasur dhe që kanë pengesa të mëdha ekonomike.
Në fjalën e tyre operatorët shprehen se mjetet dhe lundrimi po bllokohen pa arsye për shkak të një aksidenti që ka ndodhur nga një mjet privat në kulmin e sezonit turistik ndërkohë që skafet lundrojnë pa pengesa.
“Ka qenë një individ që e ka nxjerrë skafin, jo një biznes. Pse duhet të na bllokojnë neve? Aksidente ndodhin edhe rrugore, pse nuk bllokohen makinat me qera në raste kur ndodhin aksidente të tilla”– u shpreh njëri prej pronareve të mjeteve lundruese.
“Dëgjojmë shumë nëpër media, motorrët, lacat me varëse floriri, por sic e shikoni këtu nga ne janë të gjithë familjarë, dhe jemi vetëm ne që penalizohemi, jo të tjerët që bëjnë dëmin”– u shpreh një tjetër protestues.
Administratorët e këtyre biznese shprehen se zotërojnë të gjithë dokumentacionin përkatës ligjor dhe i kanë paguar taksat edhe për këtë periudhë që janë pezulluar dhe nuk kanë fituar të ardhura.
Përfaqësuesit gjithashtu shtojnë se pistat e tyre janë sipas gjithë parametrave, kanë roje plazhi dhe mjetet komandohen nga salla operative.
Në fjalën e tyre administratorët dhe pronarët e këtyre bizneseve tregojnë se bregdeti i Durrësit është i qetë dhe një model. Në këtë zonë nuk janë regjistruar aksidente dhe mjetet lundrojnë pa cënuar sigurinë e pushuesve.
Pas protestës, ata takuan edhe Drejtorin e Drejtorisë Vendore të Kufirit për të marrë një përgjigje zyrtare për këtë situatë, pasi deri më tani nuk kanë marrë një shkresë apo vendim të dalë nga institucionet përkatëse.