Jamarbër Malltezi, anëtar i Këshillit Kombëtar së PD, iu drejtua me 5 pyetje, SPAK lidhur me hetimin për inceneratorët.
Fillimisht Malltezi tha se nga Qeveria dhe Edi Rama u injorua financimi 4 milionë euro i BE për të vrapuar pas një propozimi të pakërkuar, siç ishte ai i inceneratorëve. Ai theksoi se gjithçka ndodh pasi ata i ndajnë paratë bashkarisht.
“Paguhet shumë për ta varrosur aferën e inceneratorëve, me të cilën kanë vjedhur 105 milion euro deri tani, dhe vijojnë çdo ditë. Jo vetëm para’ të shqiptarëve, por edhe taksapaguesve europianë.
Bashkimi Europian ka dhënë 4 milionë euro për përafrim legjislacioni mjedisor përmes projekteve STEMA dhe Selea. Sapo u sinkronizuan ligjet, u hartuan Strategjia dhe Plani Kombëtar i Mbetjeve.
Këto u injoruan dhe u vrapua pas një propozimi të pakërkuar për inceneratorë.
Inceneratorët bien ndesh, qoftë me strategjinë, qoftë me planin e veprimit të financuara nga Bashkimi Europian”, tha Malltezi.
Në vijim ai i drejtoi SPAK 5 pyetje, për të cilat tha se janë shumë të thjeshta pvr shqiptarët, por shumë të vështira për drejtësinë e Soros.
Pyetjet e Malltezit për SPAK
1. Pse u dhunua Strategjia dhe Plani Kombëtar për Menaxhimin e Mbetjeve që ishin në fuqi?
2. Pse u firmos kontrata, ndonëse APP kish sqaruar se procedura ishte e kundraligjshme?
3. Edi Ramën e zuri ndonjë hall i madh apo bëri ndonjë pazar po kaq të madh që firmosi kontratë në kundërshtim me ligjin?
4. Pse u mashtrua sikur kompania e sapokrijuar kishte eksperiencë të madhe me incenerimin? Si qëlloka që miqtë e Edi Ramës dhe Arben Ahmetajt qenkan ‘nonat e incenerimit’?
5. Çfarë halli apo pazari e detyruan Edi Ramën që gënjeu sikur u kryen 10 procedura brenda 1 dite?
