Policia në Britaninë e Madhe ka vendosur një shpërblim prej 10 mijë £ për informacionin që çon në arrestimin e dy shqiptarëve të kërkuar për vrasjen e Tomasz Waga, ngjarje e ndodhur më 28 janar 2021.
Pesë persona janë akuzuar tashmë në lidhje me vdekjen e Wagas. Por dy shtetas shqiptarë mbeten ende në kërkim. Sipas autoriteteve britanike ato janë:
29-vjeçari Artan Palluci, banues në Cathays, Cardiff;
22-vjeçari Elidon Elezi, banues në East Finchley, Londër.
Policia i bën apel komunitetit shqiptar në Britaninë e Madhe dhe jashtë saj për t’i ndihmuar ata të lokalizojnë dy të rinjtë.
Një shpërblim deri në 10,000 £ i ofrohet kujtdo që jep informacion të saktë që çon në arrestimin e tyre.
Inspektori detektiv Stuart Wales, nga Policia e Uellsit të Jugut, tha: kufijtë ndërkombëtarë nuk janë pengesë për ne që të ndjekim personat e dyshuar për vrasje në Mbretërinë e Bashkuar, ne kemi lidhje të shkëlqyera me kolegët e zbatimit të ligjit në të gjithë Evropën, përfshirë Shqipërinë.
“Unë do t’i bëj thirrje Pallucit dhe Elezit që është në interesin e tyre të dalin vullnetarisht dhe të rrëfejnë për atë që ka ndodhur më janar 2021”, tha ai.
Hysland Aliaj, 31 vjeç, u arrestua në Gjermani dhe u ekstradua në Britaninë e Madhe në qershor në një operacion të përbashkët që përfshinte detektivët e krimit të Policisë së Uellsit të Jugut dhe agjencitë gjermane të zbatimit të ligjit. Ai bashkohet me katër shqiptarët e tjerë: Josif Nushi, Mihal Dhana, Gledis Mehalla dhe Mario Qato të cilët do të dalin në gjyq në tetor të akuzuar për vrasje dhe vepra të tjera të ngjashme.
