Kryeministri Edi Rama ka prodhuar një seri reagimesh pas mesazheve të tij cinike, ndaj qytetarëve që reaguan ashpër lidhur me ngjarjen tragjike të ndodhur në Himarë, ku një skaf i drejtuar nga komisari i policisë, Arjan Tase, goditi për vdekje një jazë 7-vjeçare, e cila ndodhej në breg të detit.
Ngjarja e ndodhur nuk ishte e para kur një zyrtar i shtetit, një pjesëtar i Policisë së Rilindur, i merr jetën një qytetari, aq më shumë një fëmije, gabimi i vetëm i së cilës ishte se ndodhej në bregun e detit, e shoqëruar nga prindërit e saj, që kishin vendosur të kalonin pushimet në Shqipëri.
Edi Rama reagoi për ngjarjen e rëndë duke sulmuar ata që kërkonin drejtësi, ata që kërkonin mbajtjen e përgjegjësive, dhe jo hedhjen e fajit te një efektiv policie, të cilin e rikthyen në sistem, ndoshta të njëjtët njerëz që sot përpiqen të lajnë duart njëlloj si Ponc Pilati.
Pak a shumë po përsëritet e njëjta skemë si në rastin e Klodian Rashës që u ekzekutua nga një oficer policie, i cili u arrestua, u gjukua dhe u dënua vetëm pas presionit qytetar dhe protestave, pasi nëse s´do të kishte reagim, do ti shkohej deri në fund skenarit që viktima ishte i armatosur dhe policia kishte vepruar për vetëmbrojtje.
E ndërsa dëgjoni sot Edi Ramën të flasë me cinizëm ndaj ngjarjeve të tilla, të cilat shpura dhe grupet e gatshme mediatike, i klasifikojnë si “aksidente që ndodhin kudo në Botë”, kur ishte në opozitë, Kryeministri i sotëm, kishte një tjetër qasje.
Video e mëposhtme, me zë dhe figurë, tregon Edi Ramën, i cili me gojën e tij pohon se kur një polic europian vret një qytetar europian, japin dorëheqjen ministri i Brendshëm, shkarkohet prefekti, shkarkohet komisari, ndërsa Kryeministri europian i kërkon ndjesë popullit të vet për fatkeqësinë.
Në fakt Edi Rama nuk ka bërë asnjë nga këto, megjithëse ai komisari që ishte mbi skaf, duke treguar prepotencë dhe arrogancë, i mori jetën një vogëlusheje.
Shqipëria është vend europian, ashtu sikundër ka qenë edhe në kohën kur Edi Rama ishte në opozitë dhe fliste për parime.
Pas kësaj, pyetja që shtrohet si e ndjen veten Edi Rama, a është një Kryeministër europian??!!
