Sekretari Organizativ i Partisë së Lirisë, Endrit Braimllari, u shpreh në studion e Faxnews se arroganca nga institucionet shtetërore është zanafilla e të gjitha ngjarjeve të rënda që kanë ndodhur, e ku rasti i 7-vjeçares që u vra me skaf është i paimagjinueshëm.
“Ngjarje shumë e rëndë, e paimagjinueshme ajo që ka ndodhur, Shqipëria është në ditë zie. Ishim për vizitë sot te familja, ato gjenin forcën për ta përballuar por mesazhi është se në këtë vend ka një papërgjegjshmëri totale të institucioneve. Nëse ne kemi denoncuar arrogancën e shtetit, pikërisht ajo i sjell këto. Vishen me forcën arrogante të pushtetit.Përgjegjësinë duhet ta mbajnë nga kryeministri, ministrat e linjës e deri te kryetari i bashkisë së zonës, i gjithë zinxhiri komandues i policisë së shtetit”, tha Braimllari.
Lidhur me Partinë e Lirisë, Braimllari u shpreh se është një grupim politik që përfshin të gjitha shtresat ndryshe nga LSI, dhe se me hapa konkretë qytetarët do kenë pushtetin në duart e tyre.
“Partia e Lirisë ka sjellë një risi, sa i përket dhe hapjes së strukturave. Ka shumë figura të reja, intelektualë që kanë impakt në shoqëri, të rinj e të reja profesionistë, bëjnë të mundur për të rivendosur në vend demokracinë e për të dënuar papërgjegjshmërinë e Edi Ramës.
Revolucioni Anti-Korrupsion është shumë i domosdoshëm, kështu mund të ushtrojmë presionin e duhur qytetar që të vihet drejtësia. Nuk ka të bëjë thjesht me korrupsionin qendror por edhe lokal. Partia e Lirisë përfshin të gjitha shtresat, ky është ndryshimi nga LSI. Paratë e grabitura duhet ti kthehen buxhetit të shtetit, hartohen politika por shumë rrallë kemi para hapa konkretë.
Zoti Meta do të zbatojë referendumin, kemi një parlament totalisht të kapur nga Rama. Kjo parti synon të vendoset vota në funksion të qytetarëve”, tha Braimllari.
