Kryeministri Edi Rama ka reaguar përmes një postimi në rrjetet sociale lidhur me tragjedinë e ndodhur në Potam të Himarës, ku një 7 vjeçare, humbi jetën pasi u godit nga një skaf që drejtohej nga Komisari i Policisë së Shtetit, Arjan Tase.
Rama shkruan se tragjedia e familjes së të miturës në Himarë është rrëqethëse dhe s’ka fjalë ngushëlluese për dhimbjen.
“Uroj që fajtori të marrë ndëshkimin më ekstrem nga drejtësia dhe drejtuesit e Policisë së Shtetit të nxjerrin mësimet e duhura e t’u japin mësimin e duhur trupave përgjegjëse”, shkruan Rama.
Në vijim ai ka një reagim edhe për ata që sipas tij mezi që presin për të ushqyer zjarrin e luftës nga ngjarje të tilla.
“Nuk mungoi as në këtë rast kafshëria politiko-mediatike e atyre që urojnë e presin veç fatkeqësi, për të ushqyer zjarrin e luftës së tyre politike të paudhë dhe të pashpresë!”, shkruan Rama.
E ndërsa për ngjarjen në fjalë është arrestuar Arjan Tase, i cili me një urdhër të Gledis Nano, është përjashtuar nga rradhët e Policisë së Shtetit, duket se askush nuk do të mbajë përgjegjësi për mungesën e sigurisë. Edhe pse ka ftesa dhe thirrje të vazhdueshme drejtuar shqiptarëve apo turistëve të huaj për të shfrytëzuar bregdetin shqiptar, ajo që le për të dëshiruar është siguria për jetën, përveç të metave tv tjera, që duket se dalin në plan të dytë apo të tretë, në raport me atë që turisti së pari duhet të jetë i sigurtë.
