Policia e Kosovës ka goditur një grup të madh trafikantësh që dërgonin në Kosovë nga Shqipëria, emigrantë të paligjshëm, kryesisht aziatikë. Policia kreu 18 arrestime në Prizren, gjatë operacionit, njeri nga kontrabandistët tentoi edhe që t’i shtypë me makinë, oficerët e Policisë.
Hetuesit e Kosovës nga Departamenti i Kufirit njoftuan se që nga muaji mars 2022, kanë filluar hetimin rreth dyshimit se disa persona janë përfshirë në ‘trafikimin e emigrantëve’.
Numri i personave të dyshuar, të përfshirë në hetim ka qenë i madh. Ata dyshohet se emigrantët (kryesisht aziatikë), i kanë depërtuar ilegalisht nga Shqipëria, duke i kaluar deri në pjesën veriore të Kosovës, me qëllim mbërritjen e emigranteve në shtetet perëndimore.
Më 14 korrik 2022 hetuesit nga Sektori i Hetimeve kanë arrestuar të dyshuarin M.A., shtetas sirian, i cili ka qëndruar në Kosovë duke organizuar kontrabandën.
Kurse, më 30 korrik 2022, policia kufitare e ka finalizuar operacionin policor të koduar “Shkoza”.
Më 30 korrik 2022, ndërsa ishte në zhvillim e sipër trafikimi i radhës, pas marrjes së urdhrit nga Gjykata Themelore Prishtinë, fillojnë kontrollet policore në fshatin Shkozë të Prizrenit në tri lokacione.
Në njërin nga lokacionet një i dyshuar tenton t’i godasë me veturë zyrtarët policorë. Ai është arrestuar për ‘sulm ndaj personit zyrtar’ dhe dërguar në paraburgim. Ndaj tij është veçuar çështja nga të dyshuarit tjerë të përfshirë në ‘trafikimin e emigrantëve’.
Gjatë operacionit policor janë arrestuar edhe gjashtëmbëdhjetë të dyshuar për përfshirje në trafikun e emigrantëve, po ashtu edhe një për armëmbajtje pa leje.
Nga të dyshuarit janë sekuestruar katër armë zjarri, nëntëdhjetë e pesë copë fishekë, tre autobusë, dy vetura, dy radiolidhje dhe shtatëmbëdhjetë telefona celular.
Pas marrjes në pyetje të 18 të dyshuarve, me aktvendim të prokurorit, 17 nga të dyshuarit janë dërguar në paraburgim.
