Grupi hetimor ende nuk ka mundur të marrë dëshminë e Ylli Brahimit, i cili më shumë se 1 javë më parë u gjend nën breshërinë e armëve, ndërsa ndodhej në shoqërinë e Klisman Preçit, i cili mbeti viktimë.
NNgjarja e rëndë ndodhi në qendër të Laçit, ndërsa ajo pasonte atentatin ku mbetën të vrarë 3 të rinj, ngjarje e ndodhur në mbikalimin e Fushë-Krujës.
Policia dhe prokuroria kanë lidhur të dy ngjarjet me njëra-tjetrën, ndërsa dyshohet se autorët janë të njëjtët.
Gjithsesi, deri më tani policia nuk ka mundur të hedhë dritë mbi ngjarjet ku mbetën të vrarë 4 persona brenda 1 jave dhe u plagos një tjetër, Ylli Brahimi, të cilit po i kërkohet të japë dëshminë mbi ngjarjen e ndodhur në Laç.
Ajo çfarë hetuesit kanë mbledhur gjatë këtyre 7 ditëve për këtë ngjarje kriminale, janë vetëm 108 gëzhoja kallashnikovi, një automjet “Audi” të djegur dhe dy armë të djegura.
Njëherësh ekspertiza, ka provuar se ditën e krimit, DVR-ja në shtëpinë e Brahimit, që mbante në memorie filmimet nga kamerat e sigurisë, ka qënë e fikur.
Ndërsa vetë objektivi i këtij atentati, Ylli Brahimi, është tentuar dy herë të merret në pyetje nga policia dhe nuk ka qenë në gjëndje të flasë.
Madje në nisjen e dëshmisë ai u ka kërkuar oficerëve që të ndërpresin marjen në pyetje, pasi nuk ishte në gjëndje. Burimet kanë bërë të ditur se edhe masat për mbrojtjen e tij janë shtuar ndërsa në dhomën e Brahimit, hyjnë vetëm familjarët dhe punonjës të policisë që janë pjesë e grupit hetimor duke e mbajtur në ruajtje 24 orë.
Goditja e Ylli Brahimit dhe Klisman Preçit ndodhi më 22 korrik 2022, 5 ditë pas masakrës së mbikalimit të Fushë-Krujës, 17 korrik 2022 ku mbetën të vrarë Briland Martinaj, Besmir Hoxha dhe Diklen Vata.
Ngjarja u bë akoma dhe më e rëndë, pasi makina e viktimave u përfshi nga flakët, duke sjellë djegien brenda në makinë të dy personave të vrarë. Për policinë dhe prokurorinë e Laçit dhe Krujës, të dyja ngjarjet kanë lidhje me njëra-tjetrën.
