Ish-kreu i shtetit Ilir Meta ka deklaruar se Autoriteti i Dosjeve e di mjaft mirë që ai nuk ka qenë kurrë bashkëpunëtor i sistemit komunist, ndërsa shtoi se ai nuk ka jetuar kurrë në konvikt ndaj nuk ka pasur si të spiunojë dikë në rrethana të tilla.
Meta deklaroi se Autoriteti i Dosjeve do të mbajë përgjegjësi ligjore jo vetëm si institucion, por edhe përgjegjësi individuale ndaj personave të përfshirë në atë që ai e konsideron si shpifje ndaj tij.
Meta u shpreh se është 1 000% i pastër. “Të bëjnë një dokument të posaçëm për të hapur të gjithë dokumentet e Ilir Metës që nga çerdhja”, u shpreh ai.
“Jam i sigurtë që qëndrimi edhe i deputetëve të Partisë së Lirisë do të jetë transparencë e plotë për cilindo që ka qenë bashkëpunëtor i Sigurimit të Shtetit i favorizuar apo gjithçka tjetër. Absolutisht Partia e Lirisë është në krye të betejës për të shembur këtë sistem të kalbur të shantazhit që nuk bëhet, por bëhet me metoda banale, sigurimsash për të tërhequr vëmendjen nga vjedhjet që iu bëhen popullit dhe për të mbajtur në shantazh politikanë, gazetarët etj”, tha Meta në një deklaratë për mediat.
“Eshtë një përgjegjësi e madhe, e Autoritetit që po përmenden emra në publik. Emra të cilët dikur kanë qënë 19 vjec e sot i kanë fëmijët 20 vjec. Se Autoriteti i Dosjeve është institucion që duhet të kujdeset në mënyrën më të përgjegjshme që të mos rilëndohen viktimat e asaj periudhe. Autoriteti e di se Ilir Rexhep Metaj nuk ka qënë bashkëpuntor i shtetit, se ka qënë i konfirmuar që në kohën e të madhërishmit Berisha. Ato e dinë shumë mirë se kush ka qënë bashkëpuntori se ajo ndodhet në dy dosjet. Ashtu sikurse e dinë se Meta nuk ka jetuar në konvikt e nuk ka pasur mundësi që të spiunojë, unë që 1 vjec kam ardhur në Tiranë, kam bërë çerdhen te Pazari i Ri. Nuk kam jetuar në asnjë kohë në konvikt. Personi ne fjalë, këtë çështje nuk e ka diskutuar asnjëherë, se Meta nuk kishte në plan të arratisej në atë kohë se kishte në plan të dilte me të gjitha 10-ta e të dilte pedagog. Do të përmbajnë dhe përgjegjësi individuale”, tha ai.
