Kreu demokrat, Sali Berisha, u shpreh sot se Arben Ahmetaj vërtet ishte strumbullari i inceneratorëve, por Edi Rama, Erion Veliaj dhe Engjell Agaçi janë balozët e kësaj afere qindra miliona euro.
Berisha tha se ishte kjo arsyeja sepse Edi Rama nuk lejoi debatin parlamentar lidhur me ndryshimet në Qeveri, pasi shqiptarëve do ia faktonim me dokumente të gjithë këtë aferë.
“Rama ka firmosur në shkelmim të ligjeve të vendit vetëm për të vjedhur. Edi Rama, ka urdhëruar Arben Ahmetajn për prekjen e fondit rezerve të Këshillit të Ministrave që përdoret për fatkeqësi natyrore apo truma të tjera, përdorimin e tij për inceneratorët, qoftë për Elbasanin, qoftë për Fierin.
Rama është firmatari i famshëm që dha për tenderin e Sharrës 8 pikë kompanisë së vet Gugalja-Zoto-Mërtiri. Ja pse nuk lejoi diskutimin, këto do ja tregonim me dokumente shqiptarëve.
Ahmetaj është strumbullar i kësaj çështje, por bajlozët e zinj kryesorë janë Rama, Agaçi e Veliaj. Ka firmosur për 91 mln euro duke falsifikuar, duke falsifikuar dokumentin e firmosur prej tij e duke e paraqitur si dokument të të gjitha bashkive të qarkut Tiranë.
91 mln euro të firmosura të aprovuara nga Këshilli i qytetit të Tiranës, parlamenti i Tiranës, Këshilli ka bërë mbledhjen javë më vonë për të miratuar atë dokument që kishte hyrë në fuqi.
Këta nuk kanë para vjedhjes, nuk njohin asnjë pengesë, asnjë ligj, asnjë moral, prandaj sot nuk lejoi parlamentin të diskutojë”, tha Berisha.
I pyetur se si ndjehej që nuk ishte i pranishëm në ceremoninë e 100 vjetorit të marrëdhënieve SHBA-Shqipëri, Berisha me nota ironike u shpreh “të festosh me Taulant Ballën dhe Edi Ramën është njëlloj si të shkosh me Saimir Tahirin në Shtëpinë e Bardhë”. Berisha tha se do të festonte 100 vjetorin e marrdhënieve diplomatike Shqipëri-SHBA me shqiptarëtt e ndershëm dhe patriotë të Mirditës.
Ai e konsideroi mitingun e thirrur nga Edi Rama, pasditen e sotme, si një anti-miting, ku punonjësit e administratës po detyrohen të marrin pjesë për të mbajtur vendin e punës.
