Pas dhënies së dorëheqjes nga drejtimi i LSI-së, Monika Kryemadhi u shpreh se ndihet më e lirë, njësoj si emri që partia do të ketë, nën drejtimin e Ilir Metës së rikthyer.
Kryemadhi u shpreh se gjatë ushtrimit të mandatit si kryetare është ndjerë e kufizuar, dhe tashmë do ti rikthehet punës me të rinjtë.
Nga ana tjetër, njësoj si Meta, edhe Kryemadhi akuzoi Lulzim Bashën për shitjene e opozitës, të cilin e cilësoi dhe si ”mollë të kalbur”.
“Siç ka emrin, ndihemi të lirë, sot shqiptarëve iu mungon liria, liria e votës, e të shprehurit, liria e qytetarëve për tu informuar, për të pasur demokraci. Mendoj se data e sotme është shumë e rëndësishme. Unë e kam thënë gjithmonë që përveçse është shtetari më i mirë që ka Shqipëria, por edhe një nga politikanët më të përgjegjshëm, që nuk bën asnjëherë lëvizje të gabuara.
Sot nuk është rikthyer bashkëshorti i Monika Kryemadhit, rikthimi i Ilir Metës është një shans për opozitarizmin, për të përfshirë dhe për ta hapur Partinë e Lirisë, fjala që kanë më shumë nevojë sot është liria, kërkojnë më shumë ajër për të qenë liri. Unë si Monikë ndihem jashtëzakonisht mirë, më rikthen për të punuar me të rinjtë.
Si kryetare isha në një kafaz, që ishte shumë i bukur nga jashtë, por i vështirë. Pengu im i vetëm ka qenë që nuk e dëgjova Ilir Metën për djegien e mandateve, ishte emocioni që unë doja të merrja vendim e vetme edhe si një grua. Mendoj se sot më shumë se kurrë shoqëria shqiptare është e etur për liri”, tha ajo.
A do të jetë opozita më e fortë me Sali Berishën dhe Ilir Metën, në krahasim me dyshen Kryemadhi Basha?
Kryemadhi: Ohoho, shumë më shumë, molla e kalbur e kalb të gjithë arkën, është një mollë që e kalbi të gjithë opozitarizmin.
