Nga Boldnews.al
Në janar të vitit 2015, Partia Demokratike, në atë kohë në luftë frontale me LSI-në, do të akuzonte deputetin e atëhershëm Pirro Kapurani, se s’kishte paguar miliona lekë fatura dritash. Madje, bizneset e vëllezërve të tij, Vasil dhe Mihal Kapurani, kishin detyrime të majme të mbartura. Por, ashtu si shumë denoncime të PD-së, edhe ky ngeli vetëm në letër, apo në kronikat e kohës.
Shtatë vite pas atyre sulmeve dhe kur jemi future në vitin elektoral, mazhoranca ka ndezur “motorët” dhe po përdor të gjithë artilerinë, duke parë se në zgjedhjet lokale të 2023-shit do të ketë përballë PD-në e Berishës më agresive dhe LSI-në që do e marrë Meta. Pra, dy “ujqër” të vjetër të politikës, të cilët janë shumë herë më agresivë sesa Basha dhe Kryemadhi.
Po Rama, a po i merr masat? Padyshim që po, madje po përdor fonde publike që të afrojë biznesmenët më me influencë në qarqe të ndryshme. Një ndër më me influencë dhe më me para në qarkun e Korçës është familja Kapurani, e cila ka në pronësi fabrika, hotele, firma të ndryshme, duke xhiruar miliona euro. Dhe, padyshim, paraja e “hedh ujin përpjetë”, teksa këto para’ nuk i mungojnë as buxhetit, i cili me rritjen e çmimeve dhe varfërimin e shqiptarëve të thjeshtë, është mbushur.
Sipas dokumenteve që disponon BoldNews.al, Agjencia Shtetërore e Prokurimeve të Përqendruara ka shpallur fituese firmën “GRAND KORÇA”, ish-hotel Turizmi “Iliria” Korçë. Bëhet fjalë për tenderin me objekt “shërbim lavanderie për Spitalin Korçë”, me afat të marrëveshjes kuadër 48 muaj dhe me fond të marrëveshjes kuadër 107.048.337 lekë pa TVSH, ose me TVSH rreth 1 milionë euro.
Sipas dokumentit të mësipërm, në këtë tender ka marrë pjesë vetëm kompania “GRAND KORÇA”, me një vlerë 103.194.337 lekë pa TVSH, duke u shpallur edhe fituese. Megjithatë, ajo që bie më shumë në sy në këtë procedurë është se tenderi është bërë nga “qendra”, duke i hequr përgjegjësinë pushtetit lokal në Korçë.
Madje, ka informacione, se tenderi është bërë me procedura tepër strikte, duke “përjashtuar” në këtë mënyrë edhe konkurrentët e tjerë. Dhe, për më tepër, i është dhënë “qokë” familjes Kapurani, duke tentuar që ta kenë pas vetes në zgjedhjet e ardhshme lokale.
BoldNews.al bëri një vëzhgim në Qendrën Kombëtare të Biznesit për firmën “GRAND KORÇA”. Sipas dokumentit të mësipërm, kjo firmë është në pronësi me 100 % të aksioneve të z.Vasil Kapurani, i cili është vëllai i ish-deputetit të LSI-së, Piro Kapurani.
Vëllezërit Kapurani kanë një mori biznesesh në qarkun e Korçës, kryesisht në Pogradec dhe në Korçë, ndërsa Piro u bë deputet në vitin 2013 nga koalicioni i Rilindjes. Zona e influencës së tij ka qenë kryesisht Pogradeci, kjo edhe për shkak se ka pasur mbështetjen e LSI-së.
Por, me ndryshimet e fundit në politikë, Rama po synon që të marrë edhe mbështetje edhe nga biznesmenë afër LSI-së dhe PD-së. Dhe, a është ky tender, me vlerë 1 milionë euro, “qoka” që familja Kapurani të kalojë me PS-në?!
