Gjykata e Apelit Vlorë, ka vendosur të rrëzojë vendimin e gjyqtarit të Gjykatës së Shkallës së Parë Vlorë, Enkel Peza, i cili në 3 Mars 2022 vendosi të pushonte akuzat penale ndaj 13 zyrtarëve të kadastrës në këtë qytet.
Çështja e kompleksit “Ambel Beach” në Dhërmi, është një nga dosjet më të nxehta në prokurorinë e Vlorës, ku janë të implikuar zyrtarë të hipotekës, ALUIZNI-it, si dhe biznesmeni Helidon Gjikoka.
Vendimi për gjykimin e çështjes me zyrtarët e administratës të pandehur është marrë nga gjyqtarja, Iliba Bezati, e cila konstatoi të paligjshëm vendimin e gjyqtarit Peza, për të pushur akuzat për pjesën më të madhe të pandehurve.
Sipas raportimeve, në vendimin e saj të datës 12 korrik 2022 gjyqtarja Bezati, ka urdhëruar të kthejë dosjen për gjykim për të pandehurit, Helidon Gjikoka, Arition Kasaj,të akuzuar për “Mashtrim” dhe “Falsifikim dokumentesh”.
Të pandehur për “Shpërdorim detyre” dhe “Veprime që pengojnë zbulimin e të vërtetës” janë marrë dy ish-drejtori i ALUIZNI-t në Vlorë, Ardian Musta dhe shefi përgjegjës i legalizimeve, Adiseldo Rrapaj.
Gjithashtu sipas vendimit të Apelit Vlorë, nën akuzë për mashtrim dhe falsifikim dokumentesh, është marrë dhe avokati, Arition Kasaj.
Për “Veprime që pengojnë zbulimin e të vërtetës” është marrë e pandehur dhe Krupskaja Gjika, dhe zyrtarja tjetër Mimoza Rrushani.
Enida Bukuroshi dhe Jonida Hallvaxhiu janë dy punonjëse të tjera që akuzohet për “Shpërdorim detyre” dhe shumë shpejt pritet t’i nënshtrohen procesit gjyqësor.
Ndërsa Denis Metaj, Ermal Mahilaj, Andi Haxhiaj, Erdet Mandi dhe Arbër Jaupaj, janë marrë të pandehur për akuzën e “Falsifikimit të dokumentave”.
Njëherësh gjyqtarja Iliba Bezati, ka rivendosur sërish masën e sekuestrimit të kompleksit turistik “Ambel Beach”.
Hetimi për këtë rast fillimisht nisi në prokurorinë e Tiranës dhe më pas dosja u transferua në prokurorinë e Vlorës. Çështja penale, flet për tjetërsimin e pronave në fshatin Dhërmi. Bëhet fjalë për një sipërfaqe toke prej 1430 m2 me vendodhje në zonën “Perivollo” në vijën e parë të bregut të detit. Hetimi ka provuar se që prej datës 28 janar 2019, këto pasuri rezultojnë në pronësi të Helidon Gjikokës, “…fakti i kalimit të pronësisë në mënyrë të kudraligjshme nga Ilir Koka tek Helidon Gjikoka është bërë në mashtrim të ligjit dhe pa vullnet të pronarit të ligjshëm…” -thotë prokuroria.
