Emigrantët shqiptarë që punojnë dhe jetojnë në Greqi po kthehen këtë vit në një numër të ulët në Shqipëri për sezonin turistik veror. Situata ekonomike me çmimet e larta të transportit dhe shërbimeve ka ndikuar në situatën e emigrantëve. Prurjet e ulëta po ndikojnë edhe në rënien e interesit të emigrantëve për të paguar për skemat e pensioneve apo në shërbimet e tjera që më parë ata kryenin në Shqipëri.
Kthimi i emigrantëve shqiptarë nga Greqia është këtë vit më i ulët në Pikën e Kakavijës, më e madhja që lidh Shqipërinë me Greqinë.
Vështirësitë ekonomike të emigrantëve kanë ndikuar në kthimin e shqiptarëve për sezonin turistik veror në Shqipëri.
Situata në Kakavijë krahasohet gati me periudhën e pandemisë, kur në kufi ishin në fuqi masat kufizuese.
Kthimet e pakta të emigrantëve kanë ndikuar edhe në institucione vendore ku emigrantët merrnin shërbime dhe ku këtë vit ka rënie të interest të tyre dhe nuk ka radhë të gjata.
Në Drejtorinë e Sigurimeve Shoqërore Gjirokastër, koordinatorja Enkelejda Shkurti thotë se interesimi emigrantëve shqiptarë që punojnë në Greqi për të paguar në skemat vullentare për pensionet në Shqipëri ka ardhur në rënie.
“Po ta krahasojmë me vitet pararadhëse interesi ka rënë sepse integrimi i vetë emigrantëve bën punë e vet. Një emigrant i ikur në vitet 91-92 nuk ka më ineteres për të qenë kontribues aktiv në Shqipëri. Ky interes sa vjen e reduktohet. Interes ka për sigurimin vullnetar tek ai kontigjent që kanë vite pune ,5-6 vite ne Shqipëri dhe duan të plotësojnë minimumin 15 vite, për të përfituar pensionin.”.
Shumë emigrantë thotë më tej zonja Shkurti kanë punuar pa sigurime (në të zezë) në Greqi dhe e kanë të domosdsoshëm pagesën vullnetare për të plotësuar vitet e pensionit.
“Shumica e emigrantëve kanë punuar në të zezë në Greqi, të paktën kjo nga intervista që kemi bërë me ta kur paraqiten këtu. Kështu që ato vite që janë bosh si andej edhe këndej u intereson t`i paguajnë pavarësisht lejes së qëndrimit që kanë vite andej. Kështu penalizojnë edhe veten e tyre pasi as këndej dhe as andej nuk përfitojnë pensionin nëse nuk plotësojnë vitet e siguruara.”
Greqia dhe Shqipëria kanë diskutuar në nivele teknike kohët e fundit njohjen e viteve të pensionit të emigranëtve shqiptarë në Greqi por ende nukë shtë arritur një marrëveshje e ndërsjelltë.
Zonja Shkurti thotë se në përgjithësi sigurimi vullnetar ka shënuar një rënie me rreth 50% ndonëse skemat e Institutit të Sigurimeve janë efikase.
“Në sektorin e sigurimit vullnetar ka rënie pothuaj tek 50% . Nuk ka atë interes që ka pasur më parë megjithëse Instituti i Sigurimeve ka ofruar një skemë mjaft të mirë”, thotë ajo.
Edhe në Drejtorinë e Shërbimeve të Transportit, kjo është periudha që emigrantët përtërijnë dokumentet e tyre të aumtomjeteve. Greqia dhe Shqipëria kanë arritur një marrëveshje për njohjen e ndërsjelltë të lejeve të drejtimit, por emigrantët shqiptarë, sidomos banorë të zonave kufitare, vijojnë t`i kryejnë disa nga shërbimet në Shqipëri për automjetet që kanë në pronësi.
“Ne kemi hapur disa pika në bashkitë e qarkut si në Tepelenë, Përmet, për t`u ardhur në ndihmë emigrantëve“, thotë Maksi Hoxha , drejtor i Shërbimeve të Transportit në Gjirokastër.
Në përgjithësi thotë zoti Hoxha vihet re një rënie e mjeteve në qarkullim dhe kjo ka shumë faktorë.
“Duhet theksuar ka një rënie të numrit të mjeteve në qarkullim. Qarku i Gjirokastrës ka një lëvizje demografike, ka një rënie dhe duke u larguar njerëzit në emigracion nuk i marrin më shërbimet këtu”, thotë ai.
Emigracioni shqiptar në Greqi përbën pjesën dërrmuese të emigrimit jashtë vendit të shqiptarëve. Sipas të dhënave zyrtare të Instat-it në vitin 1995 në Greqi ndodheshin rreth 45% e migrantëve shqiptarë jashtë vendit, ndërsa në vitin 2019 kjo shifër zbriti në 35%.
Emigrantët në Greqi shërbejnë si një mbështetje ekonomike me dërgimin e të ardhurave për pjesën e familjarëve në Shqipëri, por edhe për sezonin turistik kur viteve të mëparshme ktheheshin masivisht në Shqipëri për të kaluar pushimet. /VOA
