Anëtari i Këshillit Kombëtar të PD, Fatbardh Kadilli, u shpreh në Task Force në Syri Tv, se Edi Rama po tenton të personalizojë si fitore të tij çeljen e negociatave me BE.
Kadilli i quan të tepërta deklaratat e Edi Ramës ndaj opozitës si dje gjatë konferencës për shtyp nga Brukseli, ashtu edhe sot kur te Kryeministria u ngrit flamuri i BE në një ceremoni të stisur dhe pa protokoll.
Ish-deputeti demokrat thotë se për të avancuar Shqipërinë drejt BE, duhet një marrëveshje e fortë politike mes mazhorancës dhe opozitës.
“Rama ka shfrytëzuar ccdo lloj momenti që t’i personalizojë fitoret që ka arritur vendi. Edhe kur bëhet një rrugë thuhet e ka bërë Rama, edhe kur lyhet një pallat, thuhet e ka lyer Rama. Normal do të duhet të bënte edhe sot një sjellje pufonate për fat të keq në prezencë të ambasadorëve. Dhe godet opozitën në ditën që, do të duhej të ishte, edhe nëse opozita do të kishte situatën më të papranushme, sikur të ishte një opozitë qartazi anti-perëndimore, sot nuk duhej të ishte momenti për të goditur opozitën. Ai godet një nga këmbët e shtetit.
Nga fjala e tij e djeshme e vetmja gjë e vërtetë ishte nuk është fillimi i fundit, por fundi i fillimit. Pra, ajo çka kemi përpara është shumë më e vështirë se sa kjo që kemi arritur deri sot, sepse negociatat kanë disa kushte të forta për të vendosur ekonominë, institucionet, të gjithë jetën shoqërore, politike në Shqipëri në disa standarde ku ne jemi goxha larg dhe që të shkojmë aty afër do të jetë me sakrifica të mëdha. Dhe këto sakrifica do të duan një marrëveshje të fortë politike ku palët politike të jenë të qarta për domosdoshmërinë dhe rrugën që do të arrihet. Rama e konsideron veten të mjaftueshëm si partner për të huajt, për Europën, për çdo gjë. Çdokush tjetër është i tepërt, opozita është e tepërt, madje edhe ekipi qeveritar për të është i panevojshëm. Rama luan një ‘one man show’, një person në skenë”, u shpreh Kadilli.
