Gjatë konferencës së parë ndërqeveritare këtë të Martë në Bruksel, kryeministri shqiptari Edi Rama deklaroi se asnjëherë nuk ka ndikuar me pushtetin ekzekutiv, në një vendim të gjyqësorit.
“Ne shkatërruam të gjithë pallatin e drejtësisë së korruptuar dhe tani kemi institucione të reja të epokës së re të drejtësisë. Nëse më parë do të kishit pyetur këdo në Shqipëri se cilat janë shanset që të shikonit prapa hekurave një politikan, do të kishin qeshur me ju. Por tashmë nuk është më ashtu. Tani askush nuk është më imun. Unë qëndroj si lideri i një mazhorance që nuk ka mbrojtur askënd nga shigjetat e drejtësisë dhe nuk ka përdorur asnjëherë shigjetat e qeverisë kundër drejtësisë. Por sigurisht që hijet se së kaluar vazhdojnë”, deklaroi Rama.
Ai shtoi se “Reforma në drejtësi kaloi në fazën e zbatimin dhe sot jemi vendi më i zhvilluar në rajon në këtë drejtim”.
“Themelet për një sistem drejtësie dhe që mund t’i besohet pas shekujsh është vendosur sot. Këto vite na kanë bërë më të vlefshëm në luftën kundër krimit dhe rrjeteve kriminale duke rritur bashkëpunime me Eurojust. Ne kemi institucione krejt të reja. SPAK dhe BKH janë elementë kryesorë të kësaj drejtësie”, u shpreh Rama.
