Pas më shumë se 8 orë qëndrimi në SPAK, ku është thirrur lidhur me hetimet që po zhvillohen për koncensionin e sterilizimit, Ilir Beqaj, ish-ministër i Shëndetësisë, tha se është pyetur si person që ka dijeni për procesin.
Beqaj tha se nuk ka frikë nga hetimi, ndërsa shtoi se u pyet nga dy prokurorët që po hetojnë çështjen.
“Kam dhënë shpjegime në cilësinë e personit që ka dijeni lidhur me procedurën. Nuk i druhem hetimeve, kam zbatuar vetëm detyrën”, tha Beqaj në një prononcim të shkurtër për mediat.
Nga raportimet mësohet se Beqaj ka dhënë dëshminë e tij lidhur me procedurën që është ndjekur, ndërsa është pyetur nga dy prokurorët Eneid Nakuçi dhe Edvin Kondili lidhur me koncensionin.
Marrja në pyetje e Ilir Beqajt, i cili ka drejtuar Ministrinë e Shëndetësisë, vjen pas marrjes në pyetje të ish-zv.ministrit Klodian Rrjepaj.
Tashmë pritet që prokurorët e SPAK të marrin një vendim se çfarë do të bëjnë lidhur me hetimet që kanë zhvilluar dhe nëse do të ngrihen ose jo akuza ndaj ish-drejtuesve të Ministrisë së Shëndetësisë.
Koncesioni në shëndetësi dhe dyshimet për korrupsion
Në vitin 2015 qeveria vendosi që shërbimi i sterilizimit të pajisjeve kirurgjikale të mos ofrohej nga vetë spitalet, por të kalohej me koncension. Kështu me datë 10 dhjetor 2015, Ministria e Shëndetësisë, ka lidhur një kontratë koncesionare 10-vjecare me kompaninë “Sani Service”.
Kontrata ishte planifikuar të zgjaste për një periudhë 10-vjeçare, me një vlerë fillestare të parashikuar prej 9.6 miliardë lekësh.
Por, në vitin 2018, shpenzimet për shërbimet e sterilizimit të personalizuar të pajisjeve kirurgjikale të kryera nga partneriteti publik-privat ishin 2 miliardë lekë, ose 28.3 për qind më shumë se plani prej 1 miliard e 560 milionë lekësh, që ishte programuar në buxhetin e vitit 2018.
Për këtë arsye, Ministria e Shëndetësisë ngriti një grup pune në datë 25 shkurt 2019 me mjekë specialistë për rishikimin e seteve kirurgjikale.
E gjitha kjo me qëllim uljen e numrit e mjeteve kirurgjikale në çdo set dhe në këtë mënyrë ulej edhe të kostot financiare.
Nga ana tjetër në dhjetor të vitit 2019, nisma “Thurje” bëri një kallëzim penal për zyrtarët publik të përfshirë në koncesionin e sterilizimit të pajisjeve kirurgjikale, të cilët mund të kenë abuzuar me to.
