Diskutimi në Komisionin e Ligjeve për hartën e re gjyqësore, mes përfaqësuesve të shoqatave të avokatëve, KLGJ dhe deputetëve, është shoqëruar me tone të forta.
Deputeti i PD Gazmend Bardhi, akuzoi KLGJ se ka marrë një vendim politik me bekimin e Edi Ramës, ndërkohë që u kundërshtua nga deputeti socialist Pandeli Majko që kërkoi t’i fikej mikrofoni.
Kreu i Dhomës së Avokatëve të Shqipërisë, Maks Haxhia, akuzoi të dy palët politike se nuk janë serioz në mbledhje.
Duke argumentuar se bojkoti i avokatëve nuk bëhet për para dhe mbushje xhepash, por për interesin e qytetarëve, të cilët do të preken nga harta e re e gjyqësorit në financat dhe çdo veprimntari të jetës së tyre, Haxhia theksoi se palët politike nuk janë serioz në mbledhje.
Ai shkoi më tej duke kërkuar që të rrëzohet vendimi i KLGJ, në mënyrë që palët të realizojnë hartën territoriale dhe paralel me të të krijojnë një hartë të vlefshme gjyqësore që do të jetë eficente për drejtësinë.
Haxhia gjithashtu konstatoi se harta e re gjyqësore është proudukt i dështimit në një farë mënyre të reformës në drejtësi pasi KLGJ dhe Ministria e Drejtësisë e pranuan se ka mungesë gjyqtarësh.
