Komiteti Teknik i Ekspertëve, në mbledhjen që zhvilloi të mërkurën për situatën e Covid-19 në vendin tonë, rekomandoi që të bëhet vaksina dhe të mbahen maskat në ambiente të mbyllura, por pa ndryshuar masat antikoronavirus, pavarësisht shtimit të rasteve gjatë ditëve të fundit.
“Për momentin, me këto shifra që kemi, nuk është rasti për të propozuar masa të tjera përveç vaksinimit”, tha Rakacolli.
“Ka një rritje të rasteve pozitive ditore dhe të përqindjes së testimeve që rezultojnë pozitive. Popullata duhet të ndërgjegjësohet për vaksinimin. Covid ka treguar që nuk ka sezonalitet dhe është i pranishëm gjatë gjithë vitit”, theksoi Eugena Tomini.
Ndërkohë, Silva Bino tha se është emergjencë për moshat e thyera (mbi 60 vjeç) që të bëjnë dozën e tretë të vaksinës, ndërsa ata që nuk janë vaksinuar fare “duhet ta kuptojnë se janë risk i madh për personat e tjerë”.
“Mbrojtja imunitare nuk zgjat. Nëse ka kaluar një muaj nga infeksioni, duhet bërë vaksina. Përfitimi nga vaksinimi është tepër i lartë dhe kjo vihet re në vendet evropiane”, tha Bino.
