Andrea Stasa, 58 vjeç, dyshohet si autori i krimit të ndodhur ditën e sotme në Divjakë, ku viktimë mbeti babai i tij, Mitër Stasa, 85 vjeç. Nga burimet policore mësohet se autori i dyshuar ka rrahur dhe më pas e ka mbytur babain e tij, ndërsa ishte në gjendje të dehur.
Policia dyshon se krimi ka ndodhur për motive të dobëta. Raportohet se babai, i cili mbeti viktimë i ka kërkuar llogari djalit, sepse kishte pirë alkool, gjë që siç duket nuk i ka pëlqyer 58 vjeçarit i cili ka dhunuar babain dhe e ka mbytur.
Në banesë ndodhej edhe djali tjetër i viktimës, dhe vëllai i autorit të dyshuar të krimit.
Policia ka shoqëruar në ambientet e komisariatit autorin e dyshuar. 58-vjeçari rezulton person me precedentë të mëparshëm penal, pasi ka kryer 13 vite burg.
Njoftimi i policisë:
Divjakë
Informacion paraprak
Sot më datë 06.07.2022, është gjetur në banesë pa shenja jete dhe me shenja dhune, shtetasi M. S., 85 vjeç, banues në Remas, Divjakë.
Nga hetimet paraprake autor i dyshuar i vrasjes së 85-vjeçarit dyshohet se është djali i tij, shtetasi A. S., 58 vjeç, i cili dyshohet se për motive të dobëta e ka mbytur.
Eshtë shoqëruar në Komisariatin e Policisë Divjakë shtetasi A. S., dhe po punohet për zbardhjen e rrethanave të ngjarjes.
