Nga Boldnews.al
Dhjetë persona u arrestuan nga policia për akuzën e korrupsionit për një copë varr në Tufinë të Tiranës. Shumica ishin zyrtarë të Bashkisë Tiranë, drejtues dhe punonjës të tjerë të ndërmarrjes Funerale të Tufinës, në varësi direkte të Bashkisë së kryeqytetit. Deri në 2 mijë euro merrnin për të siguruar një varr. Edhe kjo formë përfshinte sekserë, zyrtarë lokal, angjenci funeralesh dhe alleshverishe në emër të vdekjes.
Padyshim që nuk është një rast i izoluar, aq sa detyroi Prokurorinë e Tiranës që të merrej me këtë çështje dhe ajo që zbuluan është më shumë se makabritet. Korrupsioni nis që në lindje. Sapo një fëmijë vjen në jetë nga gëzimi apo edhe frika që të kujdesen për foshnjen dhe nënën, familjarë të foshjes së porsalindur “dorovisin” mjekë e mami.
Por pak prindër e dinë se fëmija i tyre sapo çel sytë ngarkohet nga shteti me një detyrim të madh financiar.
Duke marrë në konsideratë borxhin publik, çdo i porsalindur ka një barrë prej afër 3 mijë euro mbi shpinë, që duhet t’i shlyejë sa të jetë gjallë për këtë shtet që sot mburret se po nxit lindjen e çifteve të reja duke i joshur me 40 mijë lekë të reja për çdo lindje të fëmijës së parë dhe më pas dyfishohet ose trefishohet sipas numrit të fëmijëve.
Deri këtu një nismë në dukje e mirë, pavarësisht se bonusi dhe borxhi që i ngarkohet çdo krijese të porsalindur është shumëfish më i lartë në dëm të qytetarëve. Po Bashkia Tiranë, si mundet që edhe ajo të mos i lyej llërët me yndyrën e korrupsionit? Ka qenë traditë mëparshme që vetë bashkia të jepte 5 mijë lekë të reja për çdo lindje, por para dy vitesh edhe kjo nismë ra, duke e përkthyer në atë që e quajtën me propagandë malinje si “shporta e bebes”. Ajo parashikon një pako bebelina, shampo, një palë çorape, kapuç dhe ndonjë lodërz. Të gjithë këto përkthehen si kosto 5 mijë lekë.
Mirëpo ndodh që tendera për “shportën e bebes” bëhen të plota dhe i fitojnë kompani me çmime mjaft të larta, por disa nga sendet në shportën e bebes sigurohen nga skifterat e Policisë Bashkiake, të cilët sekuestrojnë mall kryesisht tek tregtarët abulantë. Pa fatura dhe pa procesverbale të rregullta, sendet e bllokuara i dërgojnë në tre magazina që janë në shërbim të Bashkisë Tiranë dhe aty shporta e bebes “mbushet” me mall të sekuestruar, pavarësisht se janë kryer tendera për këtë zë.
Një lind e të tjerë vdesin, si një cikël i përbotshëm i jetës. Po si mund të shkosh në varr pa paguar ryshfet? Për këtë kujdeset Bashkia Tiranë me drejtuesit e varrezave të Tufinës. Faktet tregojnë se merrnin deri në 2 mijë euro që të gjenin një vend të mirë me “mik” për varr dhe të kujdeseshin për të tjera shërbime, që t’ia bënin “nderin” të ndjerëve deri në fund.
Ndoshta përshpejtimi i ditëve për të ikur nga kjo botë ka ardhur nga ndotja e madhe e kryeqytetit, nga mungesa e ajrit, nga smogu dhe dioksidi i karbonin që lëshojnë betonieret dhe kamionët e tonazhit të rëndë që ndërtojnë kulla për oligarkinë. Megjithatë edhe në varr nuk ikin pa paguar në formë korrupsioni, për drejtuesit e Rilindjes që bëjnë para edhe me vdekjen. Mallkimi i qytetarëve është i madh që kjo farë drejtuesisht as varr mos pastë!
