Duket se raportet mes ambasadores amerikan Yuri Kim dhe Presidentit Ilir Meta i janë rikthyer normalitetit, të paktën në pamje të parë, bazuar edhe te fotot e publikuara në kuadrin e një ceremonie të organizuar nga Ambasada e SHBA në Tiranë për 4 korrikut, ditën e Pavarësisë së Shteteve të Bashkuara.
“Zoti President, faleminderit për fjalët tuaja dashamirëse në emër të popullit shqiptar”, tha ambasadorja Yuri Kim në ceremoninë që organizoi për 4 korrikun.
“Teksa mendojmë për 100-vjetorin e marrëdhënieve SHBA-Shqipëri këtë vit dhe 30-vjetorin e përfundimit të komunizmit, le t’i kujtojmë njëri-tjetrit rolin dhe përgjegjësinë solemne që të gjithë ne këtu kemi për të çmuar, ruajtur, mbrojtur, forcuar, dhe bashkëndarë demokracinë – demokracinë për të cilën secili nga popujt tanë – amerikanë dhe shqiptarë – kanë luftuar aq shumë.
Dhe tani, zoti President dhe të ftuar, ju lutem bashkohuni me mua për të ngritur një gotë për ditëlindjen e 246-të të Shteteve të Bashkuara të Amerikës, për 100 vjet miqësi jetëgjatë amerikano-shqiptare dhe – më e rëndësishmja – për të ardhmen! Gëzuar! Edhe një qind!”, tha Kim.
Përveç këtij takimi entuziast për të dy, vihet re janë edhe disa takime të tjera, ku ambasadorja Kim duket e qeshur me Presidentin, ndërkohë që para tre muajve ambasadorja ishte e ngrysur kur i jepte dorën me zor e mllef.
Nuk dihet se çfarë ka ndikuar në një normalizim të raporteve mes diplomates amerikane dhe Presidentit, që pak muaj më parë dukej se ndodheshin në pozita “lufte” mes tyre me deklarata e kundër-deklarata publike, që përmbanin jo vetëm akuza, por tregonin edhe një acarim të raporteve.
Gjithsesi në fund të mandatit, Kim dhe Meta duket se kanë lënë mënjanë përplasjet, akuzat apo qejfmbejtjet.
