Partia Demokratike e cilëson si projekt pabesie, atë që deklaroi sot Edi Rama, për legalizimin e kanabisit për përdorim vetjak.
Në një deklaratë për mediat nga selia blu, anëtarja e kryesisë së PD-së, Eleina Qirici deklaroi se ‘Edi Rama projekt tjetër pabesie. Kërkon të legalizojë kanabisin në Shqipëri, në vendin e 7 në botë për prodhim dhe trafikim të lëndëve narkotike’.
Deklaratë e PD, anëtarja e kryesisë, Eleina Qirici:
Në një raport të Kombeve të Bashkuara për vitin 2022, Shqipëria renditet e shtata në botë për origjinën, nisjen dhe transitin e kanabisit për periudhën 2016-2019.
Këtu nuk ka lajm, sepse raporti pasqyron një fakt që Partia Demokratike e thotë, e thekson, e bërtet prej kohësh.
Partia Demokratike ndjen keqardhje për murin e turpit ku e varin Shqipërinë raportet ndërkombëtare, siç është edhe ky i fundit.
Faji nuk është i raporteve, por i qeverisë në krye të vendit.
Ajo që duam të theksojmë është se, kriza nuk zgjidhet duke hapur një krizë tjetër.
Pasi i voli arat, kodrat dhe malet e Shqipërisë për 8 vjet, duke informalizuar ekonominë dhe kriminalizuar shoqërinë, Edi Rama ka gati një projekt tjetër pabesie.
Me anë të një projektligji, të bërë publik së fundmi, ai kërkon të legalizojë kanabisin.
Vendin e 7 në botë për prodhim dhe trafikim, kërkon ta fusë në thesin e legalizimit të lëndës narkotike.
Nga cili pozicion e bën kritizerin Partia Demokratike?
Së pari, Shqipëria e Ramës nuk është Amerika dhe as Holanda, me institucionet e kontrollit dhe të balancës.
Pra, nuk ka siguri se, ai që shitet si legalizim për qëllime mjekësore, nuk është formalizim i trafikut të drogës.
Së dyti, përvoja rajonale, në rastin e Maqedonisë së Veriut, ka treguar se një sipërmarrje e tillë është një dështim.
Së treti, nga tradita e partneriteteve të qeverisë, ne dyshojmë se, me të njëjtat metoda dhe të njëjtët njerëz, nuk do kemi më shumë se koncesionin e radhës të tarafeve dhe monopolizimit.
Me këto nisma, jo transparente, Shqipëria është në rrezik.
