Kryetari i PD-së Sali Berisha ka dënuar sjelljen e kryeministrit Edi Rama kundrejt gazetarit të A2, i cili pyeti ministren Olta Xhaçka për skandalin me pronën publike.
Berisha e quan sjelljen e Ramës si të denjë për kryeministrin e talebanëve dhe jo të një vendi anëtar të NATO-s.
Sipas Berishës, Rama është një armik i fjalës së lirë dhe se zgjodhi të kërcënojë dhe ndëshkojë gazetarin për fajin e vetëm se ai, duke bërë detyrën.
Postimi i plotë i Sali Berishës:
Sjellje e denjë për kryeministrin e talebanëve dhe jo të një vendi anëtar të NATO-s.
Miq, sot në një akt arrogance të dënueshme, tipike për armiqtë e fjalës së lirë, Edi Rama zgjodhi të kërcënojë dhe ndëshkojë gazetarin Klevi Muka të A2, për fajin e vetëm se ai, duke bërë detyrën, pyeti ministren Xhaçka, të përfshirë në një skandal prone publike, nëse ajo ka zbatuar rregullin e caktuar nga vetë Rama për takimet e ministrave me biznesmenë.
Duke përgëzuar gazetarin Klevin Muka për pyetjen e tij profesionale dhe legjitime, dënoj me ashpërsinë më të madhe sjelljen e përsëritur prej harbuti të Edi Ramës i cili kërcënon dhe pengon si armik i mediave gazetarët në detyrën e tyre. Ju bëj thirrje organizatave të mbrojtjes së lirisë së mediave të dënojnë me forcë më të madhe kërcënimet dhe arrogancën e përsëritur të kryeministrit Edi Rama ndaj gazetarëve dhe të mbrojnë gazetarët e kërcënuar prej tij. sb
