Kryetari i Partisë Demokratike, Sali Berisha u bëri apel qytetarëve këtë të Premte që të bashkohen në protestën e 7 Korrikut para kryeministrisë, e lajmëruar të nisë në 7 pasdite.
Në konferencën e përjavshme për gazetarët nga selia blu, Berisha paralajmëroi se kjo do të jetë protesta më e fuqishme që ka njohur ndonjëherë vendi.
Një dekret i pashembullt në histori e quajti Berisha aktin Normativ që i hap rrugë kompensimit nga shtetit të 300 kompanive të ndërtimit që kanë projekte publike. Nisma qeveritare u miratua dje në Kuvend nga mazhoranca socialiste.
“Motivet e protestës janë të jashtëzakonshme. Kurrë ndonjëherë 2 ose 3 orë të harxhuara në një protestë s’kanë pasur mision më të madh se protesta e datës 7 korrik. Ky popull po injorohet nga regjimi autokratik i Edi Ramës njëlloj si një diktaturë e vërtetë. Akti i djeshëm në parlament tejkalonte dhe imagjinatën. Dje, Rama me ligj vendosi që qindra e qindra milionë euro të fituara duke pirë gjakun e qytetarëve shqiptarë me bordet shushunja, duke rritur çmimet, qindra milion euro që u fituan nga shtimi i të ardhurave nga TVSH për shkak të rritjes së çmimeve, në vend t’jua riktheheshin atyre që kanë problem kafshatën e gojës, atyre që s’blejnë dot ilaçet për shkak të çmimeve, atyre që po iu falimentojnë bizneset dhe fermat, Rama i shpërndau me klientelën e tij, ja u shpërndau atyre të cilët kanë fituar tendera me ligjin e ri korruptiv me 99.99 përqind të vlerës (fondit limit). Ata po marrin bonusin e ri, natyrisht për ta ndarë me Ramën dhe ministrat e tij. S’ka akt më çnjerëzor se ky. Si mund të bëhet kjo”, tha Berisha.
Më tej, ai foli sërish për protestën dhe motivet për të cilët qytetarët duhet të dalin në shesh.
“Të bëjmë që zëri i qyfterëve të dridhë nga themelet këtë regjim, autokratik, kleptokratik, të bazuar mbi vjedhjet, drogën, krimin. Qytetarët shqiptarë janë të ftuar më datën 7 i 7-ti në ora 7 të protestojnë për ndryshimin e këtij vendi. Sot, Shqipëria është vendi që rrit fëmijë për emigracion, pavarësisht nga potencialet e saj mahnitëse të rinjtë largohen nga ky vend nga spastrimi etnik që po ndjek Edi Rama”, tha Berisha.
Sipas tij, kjo protestë do të jetë “sipari i një përmbushje që do çojë në përmbysjen e regjimit monist të Edi Ramës”, për të cilin tha se kontrollon të gjitha pushtetet në vend.
“Çdo ditë që kalon në këtë gjendje është një ditë jo e mirë, jo e mbarë për të gjithë shqiptarët që besojnë në lirinë dhe vlerat e saj. Ndaj dhe thirrja ime është sot e përsëritur për qytetarët, fermerët biznesmenë, profesionistët, mjekët inxhinierët, avoketërit, arkitektët, noterët, zonjat, vajzat, burrat, gratë, që të gjithë: Të bashkohemi në këtë protestë për të shpëtuara Shqipërinë. Ka vetëm një rrugë të sigurt kjo është protesta qytetare. Dhe kam besim të plotë se kjo rrugë do sjellë fitoren e popullit opozitar i cili s’kërkon asgjë tjetër veçse fitoren me votën e lirë”, u shpreh kreu i PD-së.
“Ky është vetëm fillimi. Edvin 7 korriku është vetëm fillimi, të garantoj dhe dije mirë se fjala ime është fjalë. Është fillimi se ka tejkaluar çdo vijë të kuqe në qëndrimin cinik për të mos thënë poshtërues ndaj qytetarëve për faktin që në firmën e tij ka një vjedhje. A e morët vesh që pas Butrintit i erdhi radha pallatit të brigadave”, theksoi Berisha.
