Avokati Altin Goxhaj ka qenë i ftuar në studion e Fax News ku ka folur lidhur me protestën që pritet të mbahet në datën 7 korrik pas thirrjes së bërë nga ish kryeministri Sali Berisha.
Goxhaj tha se vendi gjendej përpara një vije të kuqe dhe se protestat ishin e vetmja mënyrë për të reaguar ndaj kësaj qeverie e cila sipas tij, vetëm po shumëfishon vjedhjet edhe gjatë kohës së krizës.
Mes të tjerash, Goxhaj përmendi edhe deklaratën e Metës të bërë ditën e sotme ku presidenti deklaroi se vendi po shpopullohej nëpërmjet një agjende. Goxhaj tha se tashmë edhe klasa politike po e pranonte këtë fakt dhe prandaj ishte koha për të reaguar para se të jetë tepër vonë.
“Shqipëria është në rrezik prej 9 vitesh dhe sot ka ardhur në pikën ku mund të kalohet vija e kuqe. Situata ku ndodhemi sot është më e rënda dhe nëse e lëmë edhe pak nuk do kemi më çfarë të bëjmë. Unë besoj se 7 korriku është një moment ku mund të bëjmë kthesën midis standartit që populli ka frikë qeverinë. Qëllimi i kësaj proteste është të krijojmë një sistem frenimi në mënyrë që të ndalojë rënien e vendit në humnerë. Qeveria vetëm po shton problemet në këtë vend. Kriza e rrogave është tashmë një fakt ku njerëzit po vonojnë të marrin rrogat e tyre. Këto janë rroga bazë për të mbushur barkun me bukë.
Në një situatë të tillë, qeveria jo vetëm që nuk frenon shpenzimet publike, ku marrim edhe rastin e rrugës në Kardhiq ku kanë shtuar më shumë se 70 milionë euro për pak kilometra rrugë. Këta e kanë dhjetëfishuar vjedhjen dhe kur bie çmimi në bursa për naftën, bordi i transparencës së këtyre, e rrit edhe më shumë.
Ndërkohë sot Meta ka bërë një deklaratë të fortë dhe pas kësaj ajo që duhet të bënte duhet të ishte mbledhja e Këshillit të Sigurisë Kombëtare sepse deklaroi se Shqipëria po shpopullohej nëpërmjet një agjende të qëllimtë. Diçka të tillë e kam thënë unë prej kohësh qëkur është hapur Fax News. Sot është nëj realitet që nuk fshihet dot dhe po pranohet edhe nga klasa politike. Përballë kemi vetë armikun, që po bën spastrim etnik këtu në Shqipëri”– u shpreh avokati, Altin Goxhaj.
