Anëtari i kryesisë së PD, Gent Strazimiri në një intervistë për Fax News, tha se protesta e datës 7 korrik çelë siparin e organizimeve të tjera, të cilat pritet të mbahen në vijim për të rrëzuar sipas tij regjimin që po varfëronte çdo ditë e më shumë shqiptarët.
Strazimiri u shpreh se në këtë situatë ka dalë me fitim vetëm qeveria dhe nuk ka asnjë shenjë se këto të ardhura do të shpërndahen tek qytetarët.
“Madje edhe bordi i transparencës që supozohej të ultë çmimet, vetëm sa po i ngre më shumë.
Këtu nuk bëhet më fjalë për mallra luksi dhe as për pushime në verë. Këtu po bëhet fjalë për bukën e gojës për secilin prej qytetarëve”, tha ai.
Mendoni se në datën 7 korrik do të mblidhet në shesh i gjithë populli për të rrëzuar qeverinë?
Strazimiri: Regjimet kërkojnë punë për t’u rrëzuar por hapi i parë është që të ngrihemi të gjithë bashkë dhe ta shohim realitetin me sy. Jemi të vjedhur të gjithë nga e njëjta dorë. Ajo është dora e Edi Ramës dhe e oligarkëve të tij të cilët së bashku me qeverinë janë të vetmit të cilët nuk po e vuajnë krizën. Në 7 korrik do të mbahet protesta e parë por besoj se do të pasohet edhe nga protesta të tjera. Për të mbrojtur bukën e fëmijëve dhe për të rrëzuar këtë regjim duhet shumë mund dhe djersë. PD e ka dhënë provën se është gjithmonë në mbrojtje të interesit publik.
