Avokati Kujtim Cakrani ka qenë i ftuar në studion e Fax News ku ka folur lidhur me rrëzimin për herë të tretë në kuvend të kërkesës së opozitës për ngritjen e komisionit hetimor për investimet strategjike.
Cakrani tha se një veprim i tillë, tregonte se mazhoranca kishte diçka për të fshehur lidhur me investitorët strategjikë. Cakrani e konsideroi ligjin për investitorët strategjikë si një ligj klientelist dhe një problem të madh pasi qeveria po u jepte toka shtetërore personave të caktuar pa u zbuluar as të dhënat.
“Bëhet fjalë për një kërkesë të opozitës drejtuar kuvendit për ngritjen e një komisioni hetimor për të verifikuar të gjithë personat të cilët janë shpallur investitorë strategjikë deri më sot.
Në këto kushte duke patur parasysh faktin që sot në Shqipëri ka një problematikë të veçantë sa i takon shoqërive që kanë përfituar statusin e “investitorit strategjik” kryesisht në bregdet, sepse u janë dhënë toka me pronar, të cilëve nuk u janë dhënë këto prona por u janë dhënë personave të përcaktuar si “investitorë strategjikë”.
Ligji i miratuar në 2015 për investitorët strategjikë rezultoi të ishte një ligj krejt klientelistë duke patur parasysh personat që kanë përfituar. Gjendemi sot para një situate mafioze sepse ky është një problem shumë i madh sa i përket të drejtave dhe lirive themelore të njeriut “prona private”. Pas inceneratorëve ky është skandali më i madh i qeverisë. Fakti që mazhoranca nuk e miraton një komision hetimor, cënon rëndë jo vetëm parlamentarizmin por vërteton se Shqipëria nuk ka më kushtetutë dhe as Kuvend, është zyrtarisht në diktaturë. Përderisa fshihen të dhënat e shoqërive të personave të cilët favorizohen me toka publike, do të thotë se këtu fshihet diçka.”– u shpreh Cakrani.
