Edmond Panariti, shefi i kabinetit të presidentit, ka qenë i ftuar në studion e FaxNews ku ka folur mbi përfundimin e mandatit 5 vjeçar të Metës në krye të shtetit.
Panariti foli mbi kthimet që presidenti ka bërë për projektligje të ndryshme duke nënvizuar se këto të fundit formuloheshin vetëm nga qeveria duke e kthyer kuvendin në formalitet dhe për këtë Metës i ishte dashur të ndërhyjë me të drejtat që ja jep kushtetuta.
“Për Metën hapet një kapitull i ri. Ai e ka bërë publik qëndrimin e tij sa i përket rikthimit në politikën aktive.
Këto penelatat politike nuk dua t’i komentoj. Dihen qëndrimet e kryeministrit ndaj presidentit edhe pse ky i fundit ka qenë gjithmonë në mbrojtje të kushtetutës. Kryeministria pretendonte se të gjithë ligjet e projektuara në zyrat e saj pa asnjë lloj pengese do të kalonin sepse kuvendi ishte thjesht një formalitet.
Nuk kanë qenë të paktë ligjet anti-kushtetuese që janë kthyer por mazhoranca me kokëfortësi i ka çuar sërish për miratim. Por do vijë momenti kur këto do të rishikohen sepse çdo gjë është e përkohshme në këtë botë”-tha Panariti.
Duke folur edhe për kthimin e projekligjit për parkun e Butrintit, Panariti u shpreh se vendimi ishte marrë nga presidenti Meta i cili e kishte konsideruar të arsyeshme pas konsultimeve me shoqërinë civile.
“Deri në minutën e fundit, Meta është në të drejtën e tij me të gjitha kompetencat që ja jep kushtetuta e vendit. Presidenti nuk mund të rrinte i heshtur për këtë projektligj pas kontakteve me shoqërinë civile”– u shpreh shefi i kabinetit të presidentit.
