Kryetari i Partisë Demokratike, Sali Berisha dënoi vendimin e Edi Ramës për të bojkotuar Samitin e Bashkimit Europian.
Vendimi i marrë nga Aleksandar Vuçiç dhe Edi Rama, sipas Berishës, e shndërron Tiranën në Beograd të vogël.
“Në këtë proces të pranimit nga Edi Rama të hegjemonisë serbe në rajon u formua aleanca trilaterale me Jugosllavinë e vjetër plus Shqipërinë se Kosovën e konsideron pjesë të territorit të Serbisë. Në këtë proces u konsoliduan lidhjet jo vetëm me Beogradin, por edhe me Moskën. Ky proces solli një përçarje dhe luftë të ftohtë mes Shqipërisë dhe Kosovës. Ky proces solli atë të cilën asnjë shqiptar që ëndërron, apo që sheh sit ë ardhmen më të mirë të vendit të tij dhe të fëmijëve të tij bë BE, nuk mund ta imagjinonte. Ndodhi që një aventuries, vasal pa interesa vendi dhe interesa kombëtare të deklarojë dje se refuzoj ftesën dhe nuk kam pse shkoj në Bruksel. Ky vendim merret në Beograd dhe shpall. Kurse ky (Rama) e thotë çfarë vendos padroni. Kurrë ndonjëherë fati ynë nuk ka qenë më larg duarve tona se sa këtë herë”, tha Berisha.
Sipas tij, “nga qeveria u propagandua një Europë që ka problemet e veta të mëdha dhe i pasqyron te ne u kalua në banalitete absurde që ne jemi gati për martesë por nusja nuk na vjen. Të gjitha këto për konsum propagandistik për shoqërinë tonë. Kjo që po ndodh këto ditë është përsëritje e asaj që ndodhi në 1944 dhe 1945 në kuptim të rreshtimit. Në ato vite ne u rreshtuam në anën e kundërt të historisë. Këto vite ne përsëri po rreshtohemi në anën e kundërt të historisë. Kjo ndodhi para syve tanë. Ballkani i Hapur apo minishengen që u themelua në Novisad sipas themeluesit të saj Vuçiç 3 ditë pas Samitit se kjo është Jugosllavia e vjetër plus Shqipërinë”.
Berisha paralajmëroi protestë të fuqishme për të mbrojtur, siç u shpreh, vokacionin perëndimor të Shqipërisë dhe shqiptarëve.
“Çështja e vokacionit perëndimor është çështje e vokacionit për ne. Ne bëhemi përgjegjës. Ai dje u nis turist në Francë, normalisht ai s’do mund të kthehej më, ai duhet të rrinte atje azilant me aktin që po projekton. Edhe atje po t’i jepnin azil, por do të shkonte në Beograd me siguri. Sot është thirrja më kryesorja. Të ngrihemi dhe të përballemi, të mos dorëzojmë fatin tonë në Beograd, të mos dorëzojmë vendimmarrjen e këtij vendi në Beograd, por të qëndrojmë. Për mua nuk ka arsye më të fortë se kjo për t’u ngritur. U tejkalua çdo lloj kufiri dhe imagjinate. Unë nuk jam dakord me çiftimin që na bëjnë, por ne nuk folëm kur Maqedonia e pësoi për shkakun tonë. Maqedonia do të ishte sot anëtare po të mos vihej vetoja në çiftim. Megjithatë, kjo nuk mund të jetë kurrë motiv që ne të kalojmë në anën tjetër të historisë, në anën e zezë, të kalojmë në anën serbo-ruse të saj”, tha Berisha.
“Mendoj se ne duhet të thërrasim protestë të fuqishme. Ky është një motiv në një fare mënyre ekzistencial për kombin tonë. Nuk mundet kurrë një njeri i shitur, i paashitur, cilido qoftë ai, të luajë me fatin tonë në këtë mënyrë. Nuk mundet. Edi Rama ka shndërruar Tiranën në Beogradin e vogël, nuk mundemi ne të jemi Beogradi i vogël, ne jemi kryeqyteti i Shqipërisë dhe i shqiptarëve”, shtoi ai.
