Pesë persona kanë përfunduar në prangat e Policisë së Kukësit në kuadër të operacionit të koduar “Long Uay”.
Kështu, u godit një grupi trafikimit të lëndëve narkotike. Një sasi prej 20 kg kanabis sativa e ndarë në pesë pako u sekuestrua nga forcat e rendit.
Gjatë operacionit u arrestuan shtetasit: Dritan Xhindaj, 33 vjeç; Tautant Bejaj, 36 vjeç; Tili Xhindi, 34 vjeç; Skerdilajd Veizaj, 32 vjeç dhe Kleanth Hoxha 47 vjeç, banues në Vlorë.
Operacioni për arrestimin e tyre është bërë në bashkëpunim me Policinë e Vlorës nga ku dyshohet se është nisur lënda narkotike, destinacioni përfundimtar i së cilës nuk dihet ende. Droga do të transportohej drejt Kosovës. Në operacion janë përfshirë edhe Forca e Posaçme Operacionale në Policinë e Shtetit, ndërsa aksioni për arrestimin e trafikantëve nisi pas disa muajsh hetime.
“Gjatë operacionit, këta shtetas u kapën në flagrancë nga shërbimet e Policisë, në ambientet e jashtme të një lokali, me 20 kilogramë lëndë të dyshuar narkotike kanabis, të cilat u sekuestruan në cilësinë e provës materiale. Në cilësinë e provës materiale janë sekuestruar lënda narkotike, një automjet, 10 aparate celulare, si dhe 1250 euro”, sqaron Policia. Vijojnë hetimet për identifikimin dhe vënien para përgjegjësisë ligjore të personave të tjerë të implikuar në këtë veprimtari kriminale.
Materialet i kaluan Prokurorisë pranë Gjykatës së Shkallës së Parë Kukës, për veprën penale “Prodhimi dhe shitja e narkotikëve”, kryer në bashkëpunim.
