Armand Shkullaku thotë se niveli i kriminalitetit në Shqipëri është ngjashëm me atë të Italisë së jugut në vitet 80′.
I ftuar në emisionin “Të Paekspozuarit” në MCN TV, Shkullaku tha se kjo situatë kriminaliteti është nxitur nga lidhjet e krimit me politikën dhe se sot krimi komandon edhe shtetin.
“Ka mbërritur në këtë pikë për shkak të lidhjes së krimit me politikën. Kjo ka ndodhur rreth viteve 80′, kryesisht në Italinë e Jugut, në kohën e Falcones dhe gjeneralit De La Chiesa. Përjashtimi është që akoma nuk kanë filluar të vriten politikanë. Kjo është faza e fundit.
Pse ka ardhur situate kriminale? E kemi dëshmuar hap pas hapi.
Ju sollët shembullin e 2005. Jo vetëm në kohën e Berishës, por edhe në kohën e Nanos, edhe pse kishte ndonjë dëshirë fëmijënore Nano të shoqërohej me ndonjë të fortë dhe të pinte xhin, deri këtu shkonte.
Me krijimin e organizatës së Rilindjes u krijuan këto grupe. Fillimisht grupet e mbrojtjes së votës, që provokuan trazira dhe rrëmuja. Pastaj u kandiduan për deputetë, kryetarë bashkishë, drejtorë të rëndësishë, shefa, etj. Jemi rast i rrallë ku të paktën 20 persona të tillë u hoqën nga parlamenti dhe bashkitë.
Kryeministri atëherë, deklaroi se këta janë njerëz që janë pranë popullit, që i do populli dhe si të tillë janë nderi dhe lavdia e PS.
Kemi patur rastin e ish ministrit Tahiri. Atë periudhë grupe kriminale të caktura kontrollonin lagje të Tiranës. Ishin njerëz që nuk ushtronin presion vetëm mbi biznese dhe dyqane, por edhe mbi politikanët. Shumë politikanë ishin të varur prej tyre. Ne e dimë se si rrodhën ngjarjet, derisa dosja e Tahirit u hap.
Sot kemi politikanë që janë aksionerë me kriminelë. Kemi banditë të mirënjohur që përfitojnë tendera dhe koncesione me paratë tona. Kjo bën ndryshimin, që krimi ka marrë këto përmasa. Krimi tani e kontrollon shtetin.
Janë kriminelët që nuk e lejojnë më pushtetin të tradhtojë interesat e tyre. Shteti është nën komandën e tyre.
Mjafton të shohim përgjimet e Dibrës, për influencën që kanë mbi kryeministrin, mbi Ulsiun, etj. Këto tregojnë që krimi është ai që drejton”, tha Shkullaku.
