Punëtorët e seleksionimit të mbetjeve në inceneratorin e Elbasanit kanë ndalur punën këtë të hënë dhe dolën në protestë. Ata nuk marrin prej muajsh rrogat. Punëtorët thanë se nuk kanë marrë ende pagën e marsit, ndërsa denoncojnë faktin që Bashkia e Elbasanit u ka ulur pagat, duke ua çuar në 293 mijë lekë të vjetër.
Rrogat e punëtorëve janë ndërprerë që kurse inceneratori u vu nën sekuestro nga Prokuroria Speciale kundër Korrupsionit dhe Krimit të Organizuar. Sipas punëtorëve, një rrogë do të thotë shumë për ta, pasi të gjithë ata kanë probleme të shumta sociale, që mezi sigurojnë mbijetesën.
“Kemi tre-katër muaj që nuk i kemi marrë rrogat. Nuk kemi marrë akoma rrogën e marsit. Jo do shesim pagurët, jo do shesim hekurat, jo do shesim traktorin dhe prapë na mashtruan. Ikni e sillni numrin e llogarisë, por jo nuk hodhën lekë. Është jashtë mase e vështirë. Nuk ia dal dot për të ngrënë bukë. Rrogën e patëm 320, Bashkia na e bëri 292. 5 mijë lekë është një shishe vaji. Më vjen turp me atë pagë. Nuk mund të paguash ujin dhe dritat. Puna është shumë e rëndë, pasi kemi të bëjmë me mbeturina, me krimba”, tha një prej punëtorëve.
“Ne jemi pa bukë. Ushqimet janë shtrenjtuar. Unë kam 8 fëmijë dhe bashkë me gruan bëhemi veti i dhjeti. Me këtë rrogë 293 mijë lekë nuk e përballojmë dot. Qeveria të vërë dorë. Kalamajtë i kam pa bukë”, tha një punëtor tjetër.
Arsye tjetër që punëtorët e inceneratorit kanë ndalur punën sot është ulja e rrogës. Nëse në kohën kur impianti drejtohej nga privati merrnin 32.000 lekë, sot ajo është reduktuar në 19.300.
Sipas tyre, ata nuk po mundin të marrin as rrogën minimale të deklaruar nga vetë qeveria. Punëtorët e seleksionimit të mbetjeve protestuan edhe disa muaj më parë për mosmarrjen e pagave, por çështja e tyre u zgjidh vetëm përkohësisht. Pasi rasti u bë publik në media, pagat e tyre u shlyen, por problematika është shfaqur sërish.
MENAXHIMI I INCENERATORIT
SPAK vendosi nën sekuestro inceneratorin e Elbasanit në mes të muajit dhjetor të vitit të shkuar pas arrestimit të ish-ministrit të Mjedisit, Lefter Koka. Arrestimi dhe vendosja nën sekuestro nga ana e SPAK e kësaj vepre që shërben për djegien e mbetjeve në Elbasan dhe zonat përreth, përkoi me përfundimin e kontratës koncesionare dhe kalimin në pronësi të Bashkisë së Elbasanit dhe bashkive të tjera përreth.
Për pasojë, puna e inceneratorit nuk u ndërpre, pavarësisht procedurave ligjore, duke kaluar nën varësinë e institucione publike vendore atje. Kontrata e koncesionit me vlerë 21.6 milionë euro përfundoi më 16 dhjetor 2021.
Pas kësaj date, Sh.A e ngritur nga 7 bashkitë e qarkut të Elbasanit janë angazhuar për të marrë në dorëzim asetet e këtij koncesioni, si dhe impiantin e prodhimit të energjisë elektrike”.
Shtatë bashkitë kanë themeluar kompaninë “Eco-Elb”, ku pjesën më të madhe të aksioneve 52% e mban bashkia e Elbasanit, dhe Bashkia e Përrenjasit, Librazhdit, Peqinit, Belshit, Gramshit dhe Cërrikut kanë 8% të aksioneve në këtë vepër.
/Panorama.al/
