Socialistët kanë festuar sot 31 vjetorin e ndryshimit të emrit nga PPSH në Partia Socialiste, ndërsa festa është organizuar në hapësirën pranë selisë që qeveris vendin nga 2013-ta.
Në festimet e socialistëve ka munguar lideri historik Fatos Nano, i cili pati drejtimin e PS-së deri në 2005, kohë kur nisi shkëputjen nga politika aktive.
Por në festë nuk munguan të tjerë figura të kësaj partie, madje me lidhje nga koha e PPSH-së, si Gramoz Ruçi apo Spartak Braho.
Në festimet e socialistëve nuk kishte ftesë për demokratët, pavarësisht grupimeve se si janë ndarë ato, ndërsa LSI ka zgjedhur të përfaqësohet me Endrit Braimllarin dhe Erisa Xhixhon, dy politikanë të rinj në moshë, që e kanë nisur karrierën në partinë e themeluar nga Ilir Meta, pasi u nda nga PS-ja.
Gjithashtu nuk munguan as figura të njohura politike, si Paskal Milo, Agron Duka e Luan Rama, të cilët kanë qenë ose pjesë e PS ose në aleancë me të në periudha të ndryshme.
Partia Socialiste e Shqipërisë vendosi të ndërrojë emrin nga PPSH në PS në 12 qershor të vitit 1991. Socialistët qëndruan në opozitë nga 1992 deri në 1997, kohë kur përmes një revolucioni të armatosur ku drejtimi në zonat në jug të vendit u morr pikërisht nga disa prej figurave kryesore të saj, ose aleatëve, çuan vendin në zgjedhje të parakohshme që u fituan nga PS dhe aleatët e tyre.
Në këto zgjedhje, ku duhet thënë se në territorin në jug të vendit as mund të shkelte ndonjë përfaqësues i PD, PSSH arriti të marrë 52,7 % ose 101 vende në parlamenti. Kryetari socialist Fatos Nano u zgjodh kryeministër. Socialistët përsëritën fitoren edhe në zgjedhjet e 2001, dhe megjithëse patën votat e nevojshme për zgjedhjen e Presidentit, nuk arritën, për shkak të presionit ndërkombëtar, që kishte të bënte me manipulimet zgjedhore, veçanërisht atë që u konsiderua si fenomeni “Dushk”, ku vetëm nga një zonë elektorale u prodhuan 9 mandate deputetësh.
Në vitin 2004 Partia Socialiste do të kishte ndarjen me një grup brenda saj të cilët krijuan Lëvizjen Socialiste për Integrim. Kjo çoi në humbjen e zgjedhjeve të vitit 2005 ku pushteti kaloi në duart e qendrës se djathte pas tetë vitesh. Fatos Nano dha dorëheqjen nga posti i Kryetarit të PSSH dhe u zëvendësua me Edi Ramën i cili njëkohësisht është dhe Kryetar i Bashkisë së Kryeqytetit.
Në zgjedhjet për Kuvendin e Shqipërisë të vitit 2009 koalicioni Bashkimi për Ndryshim i drejtuar nga Partia Soicialiste e Edi Ramës siguroi 64 vende, 6 vende më pak se koalicioni Aleanca e Ndryshimit e drejtuar nga Partia Demokratike i cili siguroi 70 vende. Koalicioni Aleanca Socialiste për Integrim siguroi 4 vende. Disa ditë pas zgjedhjeve kryetari i PSSh deklaroi që zgjedhjet ishin të rregullta dhe korrekte. Këto zgjedhjet ashtu si edhe zgjedhjet e mëparëshme u monitoruan nga shumë vëzhgues ndërkombëtarë të OSCE. Mbas daljes së rezultateve kryetari i PSSH ndryshe nga deklarimet e mëparshme deklaroi se zgjedhjet ishin manipuluar, edhe pse rezultatet e tyre ishin firmosur nga komisionerët e partisë së tij. Vëzhguesit ndërkombëtarë i deklaruan zgjedhjet e vitit 2009 si zgjedhjet më të mira që ishin zhvilluar ndonjëherë në Shqipëri.
Disa nga drejtuesit e PSSH i kërkuan Ramës të pranojë humbjen dhe të japë dorëheqjen ashtu siç bëri edhe paraardhësi i tij Fatos Nano. Edi Rama edhe pse humbi zgjedhjet vendosi përsëri kandidaturën për kryetar të PSSH dhe u zgjodh kryetar i kësaj partie për mandatin e tij të 2-të me mbi 99% të votave. Këto zgjedhje u kritikuan nga disa drejtues të PSSH-së si zgjedhje formale të paracaktuara.
Rama arriti të merrte shumicën parlamentare, pas marrëveshjes së 1 prillit me Ilir Metën, në vitin 2013, dhe nga ky vit ai drejton Qeverinë.
