Mediat vendase shkruajnë se Agim Kajmaku, ish-kryebashkiaku i Vorës është arresatuar në Itali, teksa është kapur me 20 kg kokainë.
Sipas mediave të cilat citojnë burime nga policia italiane, Kajmaku është identifikuar madje ka dhënë shpjegime të hollësishme dhe arrestimi i tij ka ndodhur që në muajin maj.
Por deri në këto momente nuk kemi asgjë konkrete nga policia shqiptare, që sipas atyre që thuhen është njoftuar për operacionin, madje I ështëkërkuar edhe ndihmë.
Por kush është Agim Kajmaku?
Agim Kajmaku u zgjodh në krye të Bashkisë Vorë në zgjedhjet e 30 qershorit 2019, por u denoncua nga PD se kishte fshehur dënimin në Greqi për falsifikim parash dhe se kjo nuk ishte deklaruar në formularin e dekriminalizimit. Fillimisht kjo u mohua prej tij, por më pas u vërtetua nga prokuroria e Tiranës përmes një letërporosie dërguar autoriteteve greke se ai ishte në kërkim në 2003 për falsifikim të kartëmonedhave dhe nuk ishte arrestuar pasi kishte ikur në Shqipëri. Nga përgjigjja që Interpol Greqia dhe Interpol Tirana i kanë dërguar Prokurorisë së Përgjithshme, është vërtetuar se gjurmët e gishtërinjve të Agim Kajmakut janë të njëjta me Jorgo Toton, i cili është arrestuar në Greqi dhe këtë arrestim nuk e ka deklaruar kur ai kandidoi për zgjedhjet e 30 qershorit nën siglën e PS-së.
Kur u shpall në kërkim Kajmaku?
Ish-kryetari i Bashkisë së Vorës, Agim Kajmaku u shpall në kërkim në nëntor 2019, pasi policia dështoi të ekzekutojë një urdhër arresti të miratuar më parë nga Gjykata e Tiranës në adresë të tij.
Kajmaku akuzohet për veprat penale të “shpërdorimit të detyrës”, “falsifikimit të formularëve” si dhe “ushtrimit të funksioneve pas dhënies fund të detyrës”.
I zgjedhuri socialist në bashkinë e Vorës e humbi mandatin më 1 nëntor 2019, për shkak se nuk kishte deklaruar në formularin e dekriminalizimit ndalimin dhe hetimin e tij në Greqi nën emrin Jorgo Toto për veprën penale të përdorimit të parave false. E tashmë pritet që pozita e tij, nëse lajmi që doli në mendia është I vertëtë, të rëndohet.
