Trajneri i Kombëtares Shqiptare, Edoardo Reja analizon ndeshjen e radhës me Izraelin në Tiranë, e pesta në historinë e përballjeve mes dy skuadrave por shumë e rëndësishme për të ardhmen e kuqezinjve.
Në prag të sfidës vendimtare, tekniku italian i Shqiprisë ndalet fillimisht te kundërshtari duke e krahasuar me 4 vite më parë, ky kundërshtar ka pak pika të përbashkëta. Gjthashtu sipas Rejës, Kombëtarja shqiptare po has probleme me pasimin e fundit dhe finalizimin.
“Është një skuadër që vrapon shumë, lojtarët që ka janë shumë sulmues ndërsa në aksionet sulmuese merr pjesë edhe mbrojtja me krahët e saj. Ne duhet të shfrytëzojmë hapësirat që do të na jepen. Nuk duhet ta lejojmë Izraelin të krijojë superioritet numerik.
Ne po punojmë që të mundohemi të propozojmë sa më shumë aksione ofensive. Për shembull duke parë edhe një herë ndeshjen me Islandën, nuk kemi arritur asnjëherë kaq shumë në fundore, por për fat të keq finalizimi që është aspekti ku vazhdojmë të tregojmë dobësi.
Nuk duhet ta humbasim ndeshjen dhe nuk duhet të vuajmë kur Izraeli të sulmojë me shumë lojtarë. Ata janë të shpejtë por edhe ne do të përpiqemi t’i vendosim në vështirësi duke shfrytëzuar sa më mirë cilësitë që ka kjo skuadër dhe lojtarët. Nuk mund të them se kush do të luajë por Uzuni dhe Broja janë gati dhe në formë të mirë. Formacionin do ta bëj të ditur nesër edhe për djemtë. Uroj që nëse aktivizohen të jenë në formë optimale për të na ndihmuar të zgjidhim problemet në fazën ofensive”.
