Socialistët dorëzojnë në Kuvend kandidaturën e Bajram Begajt. Kandidatura e tij u firmos nga 37 deputetë. Sot, në mbledhjen e grupit PS, Rama deklaroi se kandidatura e Begajt do të votohet unanimisht nga socialistët.
Rama u shpreh se kandidatura e Begajt “përmbush nevojën alarmante që ka gjithë ngrehina institucionale e shtetit për një njeri normal në zyrën e Kreut të Shtetit, për një figurë sa të lartë në aspektin institucional aq dhe të pa angazhuar në gjithë përplasjet apo rrugët që kryqëzohen në arenën politike”.
Nga ana tjetër, Taulant Balla i bëri apel kreut aktual të shtetit Ilir Meta të pranojë lirimin nga detyra në Forcat e Armatosura të Bajram Begajt orët në vijim, edhe pse Meta ndodhet në Turqi. Nga ana tjetë ai shtoi se edhe nëse kjo nuk ndodh, “kemi menduar mënyrën e zgjidhjes nëse larg qoftë na krijohet ndonjë ngërç me presidentin e republikës”.
