Për tu zgjedhur kreu i ri i shtetit, Bajram Begaj, emri që kryeministri Edi Rama e njoftoi dje si kandidatura e tij për Presidentin e ardhshëm të Republikës, duhet të lirohet së pari nga detyra shtetërorë ne Forcat e Armatosura.
Parashikim ligjor e konfirmoi edhe këtë të Shtunë kreu i grupit parlamentar socialist, në mbledhjen e zhvilluar gjatë paradites.
Për këtë duhet edhe firma e kreut aktual të shtetit Ilir Meta, i cili është edhe komandant i Përgjithshëm i Forcave të Armatosura.
Balla tha në mbledhjen e grupit të PS-së se shpreson që Meta të japë dritën jeshile për lirimin nga detyra të Begajt orët në vijim, ndërsa seanca për votimin e tij është parashikuar në orën 18:00.
Por Meta, nga ana tjetër, ditën e sotme ndodhet në Turqi, ku po zhvillon një vizitë zyrtare.
“Kandidati për president ka depozituar te ministri i Mbrojtjes dhe kryeministri kërkesën e tij për dorëheqje nga detyra e shefit të shtabit të përgjithshëm të ushtrisë. Kështu që ky është një aspekt i rëndësishëm por në legjislacionin përkatës, ligji për forcat e armatosura parashikon që ushtarakët duhet të japin dorëheqjen dhe të lirohen përpara se të emërohen apo zgjidhen. Besoj se kjo procedurë do përshijë brenda minutave në vijim apo orëve në vijim dhe Presidentin e Republikës aktual, i cili duhet të bëjë dhe lirim dhe besoj se kjo s’do jetë një betejë e radhës me presidentin aktual”, tha Balla.
Megjithatë, shtoi ai, “kemi menduar mënyrën e zgjidhjes nëse larg qoftë na krijohet ndonjë ngërç me presidentin e republikës”, pa dhënë detaje rreth procedurës në fjalë.
Brenda orës 12:00, Balla tha se do depozitohet kërkesa për kandidaturën në Kuvend. Fillimisht, socialistët që kanë shumicën pritet ta miratojnë në komisionin e ligjeve. Më pas, zhvillohet edhe votimi në Kuvend, ku duhet 71 vota për të zgjedhur kreun e ri të shtetit.
