Nga Boldnews.al
Kryeministri Edi Rama dhe kryebashkiaku i Tiranës, Erion Veliaj, sulmuan, si përherë, gjyqësorin, për atë që e konsideruan si “bllokimin të procesit të Rindërtimit” në Kombinat.
Dy personazhet e lartë qeveritarë u justifikuan pak javë më parë se Rindërtimi pas tërmetit të 26 Nëntorit 2019 në Njësinë Administrative nr. 6 në kryeqytet ishte vonuar, pasi gjyqësori nuk po i hapte rrugën procesit të shpronësimit të zonave ku do të ndërtohen godinat e reja.
Por, një tender i shpallur së fundmi nga Bashkia e Tiranës, jep një panoramë të qartë mbi situatën-përgjegjësia është e gjitha mbi Erion Veliaj dhe stafin e tij.
Në fillim të kësaj jave, Bashkia ka shpallur tenderin për shembjen e disa godinave të dëmtuara nga tërmeti i 26 Nëntorit 2019. Fondi për këtë tender është 38 milionë lekë të reja.
Tenderi tregon një detaj shumë interesant për mënyrën se si funksion Veliaj dhe propagandën që ai shpërndan në median e kontrolluar në shumicë absolute prej tij.
Kur kanë kaluar rreth 30 muaj nga tërmeti tragjik i nëntorit 2019, Bashkia e Tiranës ende nuk ka finalizuar shembjen e godinave/pallateve, të cilat janë të pabanueshme që prej mëngjesit tragjik për Shqipërinë e Mesme.
Godinat e përfshirë në listën e tenderit për t’u rrëzuar, janë në përgjithësi të pabanueshme që prej orëve të para pas tërmetit.
Pra, Bashkia e Veliajt e ka pasur të lehtë që të kryejë veprime për shembjen e tyre, për më tepër që fondet i ka pasur në dispozicion nga Qeveria, shumë e shumë kohë më parë, duke i hapur në këtë mënyrë rrugë Rindërtimit.
Por, Veliaj dhe shefi i tij, Rama, janë të prirur që të mbulojnë dështimet e tyre me sulmet me natyrë të përgjithshme ndaj gjyqësorit, si e keqja më e madhe e këtij vendi dhe që pengon projektet zhvillimore në Shqipëri.
Procesi i “Rindërtimit” në Njësinë Administrative 6, në Kombinat, duket se fsheh një situatë abuzive, të iniciuar nga kryebashkiaku Veliaj.
Në zonën e Kombinatit janë shembur një numër i konsiderueshëm pallatesh të dëmtuar, duke krijuar një hapësirë të gjerë për ndërtimin e godinave të reja.
Por, Bashkia, me shumë mundësi, nuk ka në plan që të kryejë rindërtimin në territorin ku kanë qenë pallatet e dëmtuar.
Trualli i krijuar nga shembja e godinave është pronë publike dhe nuk ka asnjë pengesë për ngritjen e pallateve të reja.
Por, fakti që Veliaj dhe shefi i tij, Rama, këmbëngulin tek procesi i shpronësimit, krijojnë bindjen se qytetarët që humbën shtëpitë e tyre në tërmetin e 26 Nëntorit 2019, nuk do të kenë asnjë shans që të banojnë në të njëjtën zonë.
Gati tre vjet pas tërmetit të vitit 2019, banorët e Kombinatit nuk kanë asnjë përgjigje të saktë dhe të qartë nga Bashkia e Tiranës se ku do të ndërtohen pallatet e reja dhe se cili është destinacioni i truallit gjigand të krijuar në zonat ku më herët kanë qenë pallatet e tyre.
“Zhurmat” mes qytetarëve thonë se trualli i lakmuar do të përfundojë në dispozicion të oligarkëve të ndërtimit. Megjithatë, këto zhurma mbeten për t’u konfirmuar në muajt në vijim.
***
Lista e pallateve që do të prishen në Kombinat, sipas tenderit më të fundit të Bashkisë së Tiranës.
