Gjeneral Major Bajram Begaj, i cili ushtron detyrën e Shefit të Shtabit të Përgjithshëm të FA-së, u propozua pasditen e sotme nga Kryesia e PS si kandidat për postin e Presidentit të vendit. Pritet që emri i Begajt të zyrtarizohet mëngjesin e nesërm dhe pasditen e po të njëjtës ditë, ai të votohet nga Kuvendi.
Begaj pati një takim 20 minutësh me Kryeministrin Edi Rama, në zyrën e këtij të fundit në Kryeministri, ndërsa pas takimit tha se do të përpiqet të jetë personi i duhur për të përfaqësuar vendin me detyrën e Presidentit.
“Është vlerësim shumë i madh të jesh President i një vendi. Do të përpiqem të jem gjithmonë ai personi i duhur për atë çfarë përfaqëson ky post.
Do të jem në lartësinë e detyrës dhe i përgjegjshëm në kryerjen e saj. Vij nga ushtria dhe nga mjekësia, janë të dyja profesione shumë të mira, shumë të përkushtuar kështu që besoj se edhe detyrën, nëse nesër do të votohem, do të jem i lumtur ta kryej me nder”, tha ai.
Bashkëbisedimi
Rama: Ju falenderoj që nuk shfaqët refuzim por pranim. Do jetë nder për ne t’iu japim votën që të zgjidheni zyrtarisht President i Republikës.
Begaj: Nder i madh që të jesh President i vendit. Do përpiqem që të jem gjithmonë ai personi i duhur për atë që përfaqëson ky post. Do jem i përgjegjshëm për detyrën. Vij nga mjekësia dhe ushtria, janë profesione shumë të përkushtuara. Nëse nesër do votohem, do jem i lumtur ta kryej këtë detyrë.
Rama: Kemi bindjen që do jeni në lartësinë e kësaj detyre. Kam pasur mundësinë të çmoj punën si Shef i Shtabit, jemi njohur më parë. Por me thënë të drejtën të gjithë ata që morën fjalën, folën me respekt dhe bindjen që ju mund të bëni gjënë e duhur në detyrë.
Uroj të jeni deri në fund me atë besnikërinë që ju karakterizon ndaj shtetit, respektin që ju karakterizon për ligjin dhe forcën e madhe. Cilësi mëse të mjaftueshme për të besuar se do ta merrni shpejt përmasën e detyrës dhe do ta mishëroni atë simbolikë.
Begaj: Për ushtarakun nderi, detyra dhe atdheu janë motoja. Besoj se do i përmbush me sukses dhe 24/7 në shërbim të kësaj motoje.
