Ardian Kola, ish-kreu i Kadastrës dhe i degës së PS-së në Sarandë, i cili dyshohet se ka firmosur certifikatën e pronësisë për tokën e tjetërsuar në qendër të këtij qyteti, është shpallur në kërkim.
Kola dyshohet se ka firmosur certifikatat e pronësisë për trojet e përfituara me dokumente false.
Ardian Kola ka drejtuar ASHK Sarandë për periudhën maj 2019-korrik 2020. Ai ka qenë gjithashtu kryetar i Partisë Socialiste në periudhën maj 2018 – tetor 2020.
Gjithashtu në kërkim janë shpallur edhe vëllezërit biznesmenë Behar dhe Bedri Mucobega, përkatësisht 40 dhe 51-vjeç.
Sipas policisë, Behar Muçobega akuzohet se ka kryer veprën penale “Falsifikimi i dokumenteve”, ndërsa i vëllai Bedri Muçobega akuzohet për veprën penale “Pastrimi i produkteve të veprës penale ose veprimtarisë kriminale”. Ata akuzohet si përfitues të trojeve përmes dokumenteve të falsifikuara.
Operacioni i djeshëm i Prokurorisë për tjetërsimin e një toke 10 mijë metra katrorë çoi në arrestimin e disa zyrtarëve lokalë: shefin e Urbanistikës në bashkinë e qytetit, si dhe juristen e ASHK-së.
