Ish-kryeministri Sali Berisha deklaroi sot se minoriteti në Shqipëri është diskriminuar nga qeveria në këto 8 vite.
Duke folur në Kuvend ndërsa diskutohet raporti vjetor i veprimtarisë së Komisionerit për Mbrojtjen nga Diskriminimi, Berisha u shpreh se ka zero investime në zonat minoritare.
“Është ndjekur politika e shpërfilljes totale dhe diskriminimit të plotë të tyre. Shkoni në Korçë, edhe tregun ua morën. Faktikisht minoritetet në Shqipëri janë fiktive për të mos thënë të paqena”, tha ai.
Berisha shtoi se “ky është regjimi i diskriminimit total si në asnjë vend në Europë, si në asnjë vend tjetër të lirë. Këtu me ligje dhe vendime qeverie diskriminohen të varfrit”.
Sipas Berishës, po privohen nga shkollimi dhe arsimimi të varfrit.
“A mund të imagjinoni ju që të ngrihet mesatarja në universitete në nivelin e mesatares së Tiranës në një kohë kur 2/3 e Shqipërisë rurale është 1-1.5 e gjysmë nën mesataren e Tiranës. Në këtë mënyrë ju i diskriminoni ata se janë të varfër. Jeni kthyer në praktikat e etërve tuaj. Të diskriminuar janë demokratë me një të rënë të lapsit u hoqën 20 mijë familje nga qarku i Kukës nga ndihma ekonomike për faktin se nuk votojnë për qeverinë”, tha Berisha.
