Kategoria Superiore ka ulur siparin e sezonit 2021-2022 pasditen e sotme, teksa verdikti i vetëm i mbetur pezull, mbeti ende i tillë, pasi Kukësi e mbylli sezonin në vendin e katërt, por vetëm pas finales së Kupës Vllaznia-Laçi do të mësojë nëse do të luajë apo jo në eliminatoret e Conference League.
Bardheblutë u mposhtën me rezultatin 2-3 nga Kukësi në shtëpi, megjithatë askujt nuk i bëhej vonë për rezultatin, në një ndeshje ku të gjithë kishin ardhur për t’iu bashkuar festës së titullit kampion.
Me titullin e fituar tre javë më parë, Tirana ngriti lart zyrtarisht trofeun e 26 në histori, në një pasdite festive në “Selman Stërmasi”, aty ku nga hapja e dyerve, përfituan edhe disa tifozë holandezë që kishin mbetur në kryeqytet, për të ndjekur nëj tjetër sfidë.
Në ndeshjet e tjera, Laçi i vendit të dytë humbi kundër Partizanit, me shifrat 3-4. Vllaznia bëri detyrën kundër Kastriotit, duke triumfuar me shifrat 3-1. Da Silva e zhbllokoi ndeshjen, kurse më pas Kaina barazoi. Një penallti riktheu epërsinë e shkodranëve dhe ishte kapiteni Gurishta ai që shënoi, para se t’i mbyllte llogaritë Aralica. Tani shpresa e vetme për Vllazninë është të fitojë Kupën përballë Laçit për të arritur një vend në Europë.
Dinamo e rënë nga Superiorja e ka mbyllur kampionatin në barazim kundër Egantias, që kishte shënuar e para me Imerin. Agim Ibraimi në fund bëri që skuadrat të merrnin nga një pikë. Pa gola, 0-0, përfundoi Skënderbeu-Teuta.
Klasifikimi:
