Një ngjarje e rëndë tronditi Hanoverin në Gjermani në qershorin e vitit të kaluar, ku si pasojë e një përplasje me armë në semafor, humbi jetën një person.
Autori i krimit të rëndë është shqiptari nga Kosova, Rinor Z. Kurse viktima ishte shqiptari tjetër, Armin N. Sipas gazetës BILD, shqiptari Rinor Z. u vetëdorëzua dhe ishte në gjyq që prej nëntorit të vitit të kaluar.
Gjykimi ndaj tij përfundoi të mërkurën dhe ai u dënua me 10 vite burg. Edhe pse shqiptari tha se kishte qëlluar për vetëmbrojtje, gjykata nuk mendon kështu. Për më tepër, gjykata tha se Rinori mund të kishte goditur njerëz të pafajshëm pasi qëlloi në një kryqëzim të populluar. Por gjykata e ka parë si lehtësues faktin që Rinori e ka pranuar krimin.
Para vendimit, Rinori kërkoi falje. “Ajo që ndodhi është dënimi më i madh i jetës sime. Do të doja ta zhbëja”, tha ai. Prokuroria kishte kërkuar shtatë vite burg, kurse avokati kërkoi lirimin e tij, duke thënë se ishte një veprim emocional. Mbrojtja kërkon të apelojë vendimin.
Gjithçka ndodhi të enjten e 3 qershorit 2021. Armini ishte në makinë me kunatin e tij, Nexhip M. Ky i fundit ishte pasagjer në mjetin luksoz Porsche Cayenne me ngjyrë të zezë. Përpara tyre në semafor të kuq ishte Rinori me një Mercedes S-Class me ngjyrë të bardhë.
Nexhip M. doli në këmbë nga makina Porsche dhe goditi xhamin e përparmë të Mercedes-it të Rinorit me një shkop.
Menjëherë pas kësaj u dëgjuan të shtëna. Plumbi i parë i Rinorit nuk e goditi dot Nexhipin. Një fraksion sekonde më vonë dëgjohen krisma të tjera. Këtë herë kundër shoferit të Porsche-s, Arminit. Një plumb e godet për vdekje. Rinori e hodhi armën te një ndërtesë e re teksa po largohej. Ajo nuk është gjetur edhe sot e kësaj dite.
Rinori dhe Nexhipi thuhet se kanë pasur mosmarrëveshje edhe në të shkuarën, derisa konflikti i përshkallëzua verën e vitit 2021.
