Biznesmeni francez Jacques Bouthier u arrestua nga policia i akuzuar për trafikim të qenieve njerëzore dhe abuzim seksual ndaj të miturve. Për vite me radhë, biznesmeni 75-vjeçar dyshohet se ka abuzuar me vajza nga mosha 14 deri në 16 vjeç.
Adoleshentet jetonin të gjitha së bashku në një apartament të paguar nga milioneri francez. Biznesmeni i trajtonte si skllave seksi dhe i nxirrte nga shtëpia kur mbushnin moshën madhore, për t’i zëvendësuar me vajza më të reja.
Bouthier është një figurë e njohur në botën e kompanive të sigurimit si themelues dhe drejtor i kompanisë Assu 2000. Një e re 22-vjeçare ka denoncuar abuzimin ndaj të miturave, duke çuar në arrestimin e tij pak ditë më parë.
Vajza shkoi në një komisariat në Paris dhe u tregoi oficerëve për abuzimet që kishte pësuar në vitin 2016. Më pas ajo u shpjegoi policëve se ishte dëbuar nga banesa kur ishte rritur.
Sipas viktimës, 75-vjeçari i zgjidhte vajzat në rrugë, adoleshente në situata jashtëzakonisht të vështira familjare. Ai u premtonte vajzave strehim në këmbim të marrëdhënieve seksuale.
Si provë e akuzave, 22-vjeçarja i ka treguar policisë një video të drejtorit të Assu me një adoleshente 14-vjeçare.
Mediat franceze raportojnë se vajzat që janë mbajtur në apartament ndër vite janë konfirmuar 7, por ky mund të jetë një vlerësim provizor.
Kur 75-vjeçari kuptoi se vajza 22-vjeçare ishte gati ta denonconte, punësoi tre punonjës të shoqërisë së tij të sigurimit për ta gjetur, për ta çuar jashtë shtetit dhe për të zhdukur provat e abuzimit.
Por punonjësit nuk i zbatuan urdhrat dhe preferuan të shantazhojnë biznesmenin, duke i kërkuar një milion euro në këmbim të heshtjes. Që të tre u arrestuan.
Bouthier e themeloi kompaninë e tij në vitin 1975 në moshën 28-vjeçare. Kompania e tij ka 1800 punonjës që menaxhojnë 720.000 polica sigurimi në Francë.
Në vitin 2020, revista Challenges e vendosi biznesmenin në vendin e 487-të në renditjen e personazheve më me ndikim në Francë.
