Enkelejd Alibeaj ka thirrur një tjetër takim të deputetëve që e mbështesin, ndërkohë që me datën 30 maj zhvillohet raundi i 3-të për zgjedhjen e Presidentit.
Bazuar në diskutimet në mbledhjen e fundit të Konferencës së Kryetarëve, Taulant Balla në emrin e PS tha se kjo parti nuk do të paraqesë asnjë emër si kandidat për President, ndërkohë që kërkoi nga opozita të paraqiste një emër, të mbështetur nga firmat e 20 deputetëve.
Duket se këtë gjë do të tentojë edhe Alibeaj në takimin me deputetët demokratë që e mbështesin, duke synuar që një nga 8 emrat që janë propozuar në atë që ai e konsideron si mbledhjen e Grupit Parlamentar, t´ia paraqesë Taulant Ballës si propozim të opozitës.
Opozita dhe mazhoranca arritën dakordësinë, që propozimet në 3 raundet e para ti bënin grupet parlamentare të opozitës, e në rast se në Kuvend nuk çohet asnjë kandidaturë dhe këtë të dielë, radhën e ka PS.
“Përshëndetje! Nesër në orën 10:30 në seli do të zhvillojmë mbledhje grupi. Ju faleminderit!”, thuhet në mesazhin që i është dërguar deputetëve të PD.
