Komisioneri Publik kërkon nga KPA një hetim në dy kritere për prokuroren e Tiranës, Elfrida Bregova. Kjo e fundit ishte konfrimuar në detyrë me vendimin e KPK të datës 8 prill 2022. Në kërkesën drejtuar KPA, Komisioneri Publik shprehet ose për ndryshimin e vendimit, ose lënien në fuqi të tij, pas hetimit të thelluar në kriterin e pasurisë dhe atë të figurës.
“Me qëllim garantimin e mbrojtjes së interesit publik gjatë procesit të rivlerësimit, Komisioneri Publik ka detyrimin që të ushtrojë kontroll mbi vendimet e dhëna nga Komisioni, duke vlerësuar nëse vendimmarrja e tij është në përputhje me kërkesat kushtetuese e ligjore, bazohet në një hetim administrativ të gjithanshëm e shterues dhe vlerësim të drejtë të provave të administruara”, thuhet në njoftimin zyrtar.
Komisioneri Publik, mbështetur në kompetencën e tij kushtetuese dhe ligjore, konstaton se nga shqyrtimi i vendimit nr. 524/2022, të Komisionit, dhe akteve shoqëruese të tij, paraqiten rrethana të tilla ligjore e fakti, për të cilat çmon se ky vendim është i cenueshëm, së paku, në lidhje me kriterin e vlerësimit të pasurisë dhe atë të figurës, pasi përmban shkaqe të mjaftueshme ligjore për t’iu paraqitur juridiksionit kontrollues dhe
rivlerësues të Kolegjit.
Sa më sipër, Komisioneri Publik çmon se procesi i hetimit, i kryer nga Komisioni për kriterin e vlerësimit të pasurisë, nuk ka qenë i plotë, e për rrjedhojë, përfundimet e arritura nuk janë në pajtueshmëri me provat e administruara. Komisioneri Publik, nëpërmjet këtij mjeti procedural (ankimit), në respektim të kërkesave kushtetuese e ligjore për rivlerësimin kalimtar të subjekteve dhe në mbrojtje të interesit publik, synon kontrollin e vendimit nr. 524/2022, të Komisionit nga ana e Kolegjit, lidhur me nevojën e hetimit të mëtejshëm për kriterin e pasurisë, bazuar në përmbajtjen e akteve të fashikullit, për subjektin e rivlerësimit dhe personit të lidhur me të, referuar përcaktimeve të nenit D, të aneksit të Kushtetutës dhe ligjit nr. 84/2016.
Në këto kushte, në vlerësim dhe të faktit se raporti i DSIK-së është hartuar pa u administruar informacioni i SHISH-it, bazuar në nenin C, pika 2, nenin F, pikat 3 dhe 7, të aneksit të Kushtetutës, si dhe nenet 4 dhe 66, të ligjit nr. 84/2016, ky ankim i Komisionerit Publik ndaj vendimit nr. 524/2022, të Komisionit, ushtrohet për këto dy kritere rivlerësimi.
